Dikarang Rengenyan Labang
KUCHING: Simposium Energi Gadung enggau Pemandang (GEES) 2023 ngayanka komitmen Sarawak nyadi pengerandang dalam kuasa ulih dikemaru di Malaysia sereta nempa menua jemah ila ti lebih gadung enggau meruan ungkup rayat.
Menteri Pelajar, Inovesyen enggau Pemansang Bakat, Datuk Roland Sagah Wee Inn madahka simposium antarabansa nya diatur berengkah sehari tu ngagai pagila (8 Jun) ba Palan Penyulut Teknologi Sarawak (CENTEXS).
GEES 2023 enggau Solar Testbed 2023 diatur Opis Menteri Pelajar, Inovesyen enggau Pemansang Bakat (MEITD) nengah CENTEXS enggau kolaboreysen ETHOS Academy of Skills Development, dipelaba dipenyadika Premier Sarawak, Datuk Patinggi Tan Sri Abang Johari Tun Openg, sehari tu.
"Objektif Simposium Energi Gadung enggau Pemandang (GEES) 2023 (Green Energy Symposium & Exhibition Sarawak ) tu kena ngayan enggau ngetanka komitmen Sarawak nyadi pengerandang energi ulih dikemaru di Malaysia sereta nempa menua jemah ila ti lebih gadung enggau meruan ungkup rayat.
"Dipelaba lebih 600 iku penyereta simposium ke diatur dua hari tu ti nyengkaum pengari ari Semenanjung Malaysia, Kalimatan enggau Sabah. Simposium tu mega deka mai mayuh pakar tebilang ari serata dunya nyengkaum Eropah, China,India, Hong Kong enggau Semenanjung Malaysia, sereta pakar ari menua tu empu.
"Sesi simposium (GEES 2023) deka meri penemu ngagai penyereta pasal teknologi gadung, rampa menua, enggau langkar kereja nyaga enggau ngasika, dagang mimit karbon (low carbon businesses), 'green financing' enggau mekanisma dagang ngeluarka karbon. Tu ulih mantu organisesyen kita nyapai aspiresyen jemah ila ti meruan mimit karbon," ku iya.
Sagah madahka pekara nya maya aum pengarang berita GEES 2023 enggau Solar Testbed 2023 ti diatur ba sebuah hotel ditu, kemari.
Bejaku baru, iya madah simposium nya deka nyengkaum juluk perintah negeri Sarawak ti ngemerankan bidang energi gadung.
Iya madahka nya mega setipak enggau pekara ti suah disebut Premier Sarawak, lalu MEITD nengah CENTEXS benung nyerariska latih sida iya ti nuju lebih ngagai gadung kena napi peminta guna Industri Energi.
Nitihku iya,penau bekaul enggau pengereja pengawa di serata dunya majak nambah.
"Bepelasarka asil ti ditemu Global Green Skills Report 2022 (Linkedln), penau gadung (green talent) ba pengereja pengawa udah nambah lebih ari 38 peratus kenyau ari taun 2015," ku iya.
Ku iya, CENTEXS nempa kerejasama rat enggau kaban kunsi industri kena napi ubah gaya hari nengah chara nyendiaka mayuh agi modul latih gadung, tanggungpengawa gadung enggau kereja.
Kelimpah ari nya, iya madahka nyerumba GEES nya bisi semilan bansal pemandang disediaka lalu nambahka nya CENTEXS bisi bejalaika inisiatif ngatur Kimpin Gadung berengkah ari 19 Mei ngagai 23 Jun 2023 ba CENTEXS.
"MEITD nengah CENTEXS komited nyukung ekonomi gadung ti meruan enggau transformesyen energi kena nyapai juluk Sarawak 2030 enggau sukung sereta kerejasama perintah enggau kaban kunsi strategik, industri enggau komuniti.
"Tanggungpengawa enggau pengelandik gadung iya nya pekara ke pemadu beguna dalam penyulut enggau pengelengkas ngalih ngagai gadung di Sarawak. Juluk iya kena ngelatih penyereta Sarawak enggau antarabansa pasal Energi Gadung sehari tu," ku iya.
Sama bisi maya aum pengarang berita, Chairman CENTEXS Tan Sri Datuk Amar Mohamad Morshidi Abdul Ghani enggau sida ke bukai.