KUCHING: Langgur penemu Menteri Besai Datuk Seri Anwar Ibrahim bedau lama udah ambika bala nembiak sekula diajar enggau patut nyaga pemeresi agu sekula nengah chara meresi ke diri empu perengkaguna nya, udah meri mayuh macham timbal ari mensia mayuh.
Tebal agi raban ba media sosial setuju enggau penemu nya sereta ngerintaika mayuh macham pemaik enggau empas positif ti deka diulih bala nembiak sekula nya enti sida diberi tanggungpengawa ngereja pengawa nya di sekula.
Bisi mega nyukung penemu nya sereta madahka kereja nya enda udah dikereja ba sekula kenyau ari suba.
Bisi mega madahka sistem ke baka nya udah dikemeranka ba sekeda menua tasik ti maju baka di Jepun, kena ngajar raban biak ngembuan tanggungpengawa, kelimpah ari nempa sia nyadi mensia ti meruan jemah ila.
Indai siku anak lelaki, Benaffy Rosta Shaelabo, 32, ti setuju enggau penemu Menteri Besai nya madah, nengah chara ngambi tanggungpengawa nyaga pemeresi agu, bala nembiak sekula deka nemu pemesai reti pekara pemeresi enggau pengerai.
“Ba penemu aku nya siti pekara ti beguna sereta engkeman amat dipejalaika laban nya ulih ngajar bala nembiak ngembuan tanggungpengawa ukai semina ba agu aja, tang mega pemeresi dalam kandang sekula.
“Sida mega deka belajar meresi endur nya taja pan ngena nya ninting hari.
“Nya mega ulih mantu nentuka kandang ngelingi ti beresi, likun sereta lantang ungkup semua penguna agu di sekula,” pia ku iya ke bekereja nyadi eksekutif pengatur kereja ba Utusan Borneo.
Siku orang ke udah pinchin kereja nyadi pengelicha perubat Abang Junaidi Abang Gom, 66, setuju enggau penemu Benaffy, tang deka ngemujurka pekara nya nya ku iya, peragam ati bala nembiak sekula ti suah meresi agu, nya endang kereja ti kamah sereta berasai geli mesti dikemetulka dulu.
Ku apai semilan iku anak nya, bala nembiak sekula patut dipadahka sentang empas ti enda manah enti perengkaguna nya enda dijaga enggau manah sereta dilakka kamah.
“Tuju aktiviti meresi agu sekula endang kena nyaga pemeresi kena nyamin pengerai bala nembiak sekula nya empu, kelimpah ari nyeliahka pengelekai penyakit berampit.
“Ingatka mih jaku pesan ‘ nyeliah manah agi ari ngubat ’,” ku iya.
Ku iya baru, sida ba sekula deka ngaga tusun kereja sechara begintir meresi agu sekula sebedau berengkah jam besekula enggau pengudah abis jam besekula.
Ba penemu Betty Dam, indai lima iku anak madahka chara nya endang kena ngajar bala nembiak sekula ngembuan ulah bisi penyinu sereta enda beratka diri empu aja.
“Nengah chara meresi enggau nyaga kediri empu pemeresi agu sekula, bala nembiak nemu pemar pengawa orang ti meresi agu sekula nya ninting hari.
“Kelimpah ari nya, nya mega ulih meri penyedar ngagai mensia mayuh sentang pemesai reti meresi agu sekula.
“Nya alai, asai aku pekara nya endang patut dipejalaika,” ku iya ke beumur 45 taun.
Penemu tu disukung Penghulu Ismail Samsudin Puteh, 51, ti madahka pengawa meresi agu nya tau nelebaka bala nembiak sekula ngasaika pemar ti ditapi orang ti enda benasit manah.
“Kelimpah ari nya, bala nembiak sekula mega deka nelebaka diri ngereja pengawa pengasih pengelantang pendiau,” ku iya ti pechaya pengawa ke diberi ulih ditembuka enda lama, kelebih agi enti dikereja sechara ngerupan.