MIRI: Sebuah struktur viaduct (jematan atas) semanjai 400 meter ba senentang CH49+600 Jalai Besai Pan Borneo Pakej Kereja 11 (WPC11) Sungai Tangap-Simpang Pujut Link, ditu deka berengkah dipejalai dalam suku ketiga taun tu dikena mutar penanggul tanah ti tekerap ba kandang endur projek jalai besai nya.
Menteri Kereja Raya Dato Alexander Nanta Linggi madah, pengawa ngaga tu ti ngena timpuh urung dua taun dipelabaka tembu dalam taun 2025.
“Lebuh pengawa nambahka tanah jalai digaga ba kandang endur sebedau tu, tanah ti ditambah udah betapi enggau penanggul tekerap nyentuk 0.5 meter.
“Nya alai, Raban Projek Pan Borneo minta ngambika struktur viaduct digaga ba atas jalai ti betapi enggau panggul tanah tekerap tu,” ku iya madah ngagai pengarang berita lebuh ti ngatur pengawa matau ngagai taba projek tu, bedau lama ti udah.
Diatu, ku iya, langkar lukis viaduct tu udah tembu lalu pengawa ngaga tu deka dimunka enda lama agi urung bulan Jun tu lalu dipelaba tembu dalam taun 2025.
Beserimbai enggau tu, iya mega nyamin iya nya pengawa ngaga viaduct tu enda deka nekul pejalai trafik laban penguna agi ulih ngena jalai ti endang udah bisi sepiak nya.
Viaduct iya nya mutarka ngena chara injiniring ti nyambung pengujung siti jalai ke jalai bukai nengah lebak lalu infrastruktur tu iya nya suah agi ari kereban ti tan dikena nentuka jalai dipansa perengka pengangkut tu likun.
Alexander madah iya nya pemansang pengawa ngaga Jalai Besai Pan Borneo ke udah tembu iya nya urung 94 peratus, lalu ungkup WPC11 Sungai Tangap-Simpang Pujut Link udah nyapai 89 peratus tembu.
Ku iya nerang agi, WPC11 Sungai Tangap-Simpang Pujut Link dipelabka tembu bererenggat entara taun 2023 nyentuk 2026.
Sama datai Menijer Zon Utara Pampang Jalai Besai Pan Borneo Opis Kereja Raya (JKR) Sarawak Ir. Siaw Ming Chian, Injinir Bagi Menua Miri JKR Sarawak Ir Stephen Ung enggau Menijer Komunikasyen Korporat Pampang Jalai Besai Pan Borneo JKR Sarawak Sahrein Maloh.
Beserimbai enggau tu, dalam program iya matau ke Miri, iya mega bisi ngelawa ke roundabout Pujut 3 laban deka meda diri empu gaya trafik nengah palan nya ke alai suah diripotka sekut ti nyapai 'Level of Service E' (LoS E).
“Penyampau perengka pengangkut majak nambah ba semanjai Jalai Pujut-Lutong ti ngujungka jalai balat sekut lebuh jam orang ti mayuh laban tu iya nya jalai besai ari kandang menua tu ke pasar Miri.
“Aku dipadahka iya nya peminta ngangkatmanah roundabout sereta mega jalai tu semanjai tiga kilometer udah digaga JKR Sarawak sereta udah diangkat Opis Menteri Kereja Raya ngagai Pelin Pusin 4, Langgur Pemansang Melaysia Lumpar Ke-12 (RMK12),” ku iya.