Penyangkai Kapal Bukit Sari siti ari projek besai ti deka digaga di Lawas kelimpah ari Padang Bilun Lawas
“Siti agi projek besai ti udah bulih pemendar iya nya Penyangkai Kapal Bukit Sari. Malah, lebuh Premier Sarawak Datuk Patinggi Tan Sri Abang Johari Tun Abang Openg nemuai ke Long Tuma, projek tu dikemendarka iya”
Datuk Henry Sum Agong
Kaban Parlimen Lawas
LAWAS: Penyangkai Kapal Bukit Sari siti ari projek besai ti deka digaga di Lawas kelimpah ari Padang Bilun Lawas ti beungkus RM600 juta, deka nyadi penegap ke pemansang ekonomi di wilayah utara.
Kaban Parlimen Lawas,Datuk Henry Sum Agong madah, pengawa ngaga sekeda projek besai nya endang dikearapka ulih ngubah landskap pasar Lawas.
“Siti agi projek besai ti udah bulih pemendar iya nya Penyangkai Kapal Bukit Sari. Malah, lebuh Premier Sarawak Datuk Patinggi Tan Sri Abang Johari Tun Abang Openg nemuai ke Long Tuma, projek tu dikemendarka iya," ku iya maya bejadi Pesta Irau Aco Lun Bawang ke-36 di Dataran Lawas ditu, kemari.
Sama bisi maya nya Kaban Kunsil Negeri (ADUN) Ba Kelalan Baru Bian, Sekretari Politik Premier Sarawak Kunsilor Awangku Jinal Abedin Pengiran Jawa enggau Sam Laya sereta Presiden Serakup Lun Bawang Sarawak (PLBS) Dolphina Alau Balang, chairman pengatur, Jude Benjamin Lisa enggau Temenggung Kading Silo.
Ku Henry, diatu Lawas agi suntuk infrastruktur tang enggau pemisi perambu pemansang ti benung digaga, iya melabaka ubah positif ba taun ke deka datai.
"Ke penemu rama, di Lawas tu kami bulih projek pemansang enggau projek ke besai ari perintah negeri enggau perintah besai. Sehari tu kami engagu suntuk sekeda pemansang, tang kami ngarapka sekeda projek dikemendar meri pemaik ngagai kitai ba timpuh ke semak," ku iya.
Ungkup pengawa Padang Bilun Baru Lawas di Sundar, Lawas, nya ambika bi un ke besai agi ulih sangkai ditu.
Ku Henry Sum, fasa keterubah projek nya dijangka berengkah digaga tengah taun.
Kelimpah ari ngaga Rengkayan Jalai Besai Sabah-Sarawak (SSLR)ti benung digaga, Henry Sum mega madahka iya bisi minta digagaka jalai tambah ari Ba Kelalan ke garis entara menua Indonesia.
Ku iya, agih belanja ungkup projek inya sepenyampau RM80 juta udah dikemendarka.
"Projek agi ba renggat pansik tumu. Aku deka betemu enggau opis ke bekaul di Ba Kelalan enda lama agi bekaul enggau projek nya," ku iya.
Ngenang pengerami nya, Henry Sum muji komiti pengatur laban pengerami tiga hari mujur lalu matak penatai temuai beribu iku ari Kalimantan, Brunei, Sabah enggau Labuan ti ngenedatka pasar mit Lawas maya festival ninting taun nya.
Berebak enggau nya, iya meri langgur penemu ngagai PLBS ambika berunding numb uhka siti palan ti meri pemaik ngaga raban bansa Lun Bawang.
"Aku ngungkupka RM250,000 ngagai PLBS kena ngaga projek nya. Aku meri langgur penemu numbuhka palan nya ambika bisi endur kitai ngatur program ke baka tu dudi ila," ku iya.
Dulu ari nya, ADUN Ba Kelalan Baru Bian lebuh ke bejaku madahka bisi batang empat komponen mesti dikemeratka lebuh ngemansangka Lawas.
Ku iya, infrastruktur nyengkaum akses ngagai jalai alu ke meruan agi enggau elekterik, Hak Adat Anak Negeri (NCR), aktiviti ekonomi sereta sambung Internet mesti diputarka.
"Aku majak negika isu bekaul enggau NCR kena nentuka tanah kitai dijaga nyengkaum kampung ke ngelingi menua kitai.
"Ba timpuh ke sama,enggau pemansang majak datai ke menua kitai, kitai patut sedia untuk ngemansangka tanah NCR ungkup aktiviti ekonomi," ku iya.
Ku Baru, taja pan rayat begunaka pemansang tang sida mesti bejejaga enggau empas negatif nyengkaum penanggul rama baka gian dadah ti dipelabaka majak nambah.
“Penanggul gian dadah nyadi penanggul kritikal ditu lalu kita mesti bejejaga sereta madamka nya ambika enda nyadi balat agi. Judi nadai pemendar mega penanggul rama ti mesti diputarka.
“Nyadi ketuai sereta apai indai, kitai mesti bejalaika tanggungpengawa kitai lalu bekerejasama enggau opis bekuasa dalam perkara tu,” ku iya.