KAPIT: Menteri Kereja Raya (JKR) Malaysia, Dato Sri Alexander Nanta Linggi bedau lama udah bisi mulaika diri ngagai sitak iya Parlimen Kapit sereta nemuai ngagai rayat di Song (N 62 Katibas) enggau Kapit (N 61 Kapit, N 63 Bukit Goram).
Di Song, Nanta disempulang ADUN Katibas Lidam Assan, Song D.O Harry Bruce enggau Ambrose Abong Bugek ke mega Sekretari Politik Menteri Kereja Raya.
Kelimpah ari nyuaka Projek Mit Pemansang Menua Pesisir (MRP) ke diatur ba Rumah Temuai VIP Song, Nanta mega bisi ngabas Sekula Primari NangaTemalat, Song ti benung ngaga blok begunan baru diatu.
Ngena peluang nya mega iya bisi nemuai ngagai Rumah Kanching, Nanga Sekedai enggau Rumah Kideng, Nanga Sebuloh beratika chara ti pemadu manah kena nambahka pemanah infrastruktur di kededua rumah panjai nya.
Di Kapit, Nanta udah disempulang Sapit Menteri ba Opis Premier (Adat enggau Undang-Undang Bumiputera) Jefferson Jamit Unyat, Residen Kapit Galong Luang, D.O Kapit Cerisologo Sabu bejadi pengerami Mantar Gawai Kapit ti diatur ba Dewan Suarah Kapit kelimpah ari nyuaka MRP ngagai mayuh bengkah serakup enggau kelab ba Meligai Hotel.
Semua penyampau ungkup belanja MRP nya bisi RM500,000.