Dikarang Rengenyan Labang
KUCHING: Skim Duit Jali Rumah Panjai di Sarawak dalam timpuh 45 taun udah nguntungka 1,048 rumah panjai ti mungkur 23,038 pintu bilik.
Sapit Premier Sarawak ti mega Menteri Pengerai Mensia Mayuh, Pengawa Berumah enggau Perintah Lokal, Dato Sri Dr. Sim Kui Hian madahka skim nya udah nerima ungkup belanja ari perintah besai enggau Sarawak.
Taja pia ku iya, ungkup belanja ari perintah besai bisi tatak lalu berindik ari pekara nya perintah Sarawak meri belanja tambah ninting taun kenyau ari taun 2020, iya nya ngungkupka RM50 juta ninting taun ngagai rumah panjai kena ngenyampatka transformesyen pengidup di menua pesisir enggau ngurangka lis nama nganti peminta nginjau ari rumah panjai di serata negeri tu.
“Kenyau ari taun 1978 nyentuk taun 2023, Skim Duit Jali Rumah Panjai di Sarawak udah nguntungka 1,048 rumah panjai ti mungkur 23,038 pintu bilik. Tu begunaka ungkup belanja sepenyampau RM431.28 juta nyengkaum RM231.28 juta ari perintah besai enggau RM200 juta ari perintah Sarawak.
“Naka ke diatu, nengah belanja perintah Sarawak, sepenyampau RM139.08 juta udah diagih ti nguntungka 216 buah rumah panjai ti mungkur 4,688 pintu bilik.
“Ba taun 2023, bisi 63 rumah panjai ti diterima ari 1,299 pintu bilik udah dikemendar enggau nganti dibayar. Ke diatu, bisi 261 rumah panjai ti mungkur 5,150 pintu bilik agi dalam rintai nganti,” ku iya.
Dr. Sim madahka pekara nya lebuh ti nyimpul jurai Opis Menteri Pengerai Mensia Mayuh, Pengawa Berumah enggau Perintah Lokal ba aum DUN ti diatur ba Kompleks DUN Sarawak ditu, kemari.
Kelimpah ari nya, lebuh ti ngenang penanggul pembiayaan akhir ti ngeruga pemeli rumah raban bepenatai pemisi mit (B40) enggau raban bepenatai pemisi jelan iya (M40), Dr. Sim madahka Perintah Sarawak nengah Mutiara Mortgage & Credit Sdn Bhd udah ngemendarka 1,382 peminta ti begunaka ungkus belanja sepenyampau RM83 juta.
“Nyentuk ke diatu, ari penyampau ti dikemendarka bisi RM50 juta udah diagih ngagai 1,003 iku pemeli rumah enggau penyampau bungai setaun 1 peratus ungkup B40 lalu 3 peratus ungkup M40,” ku iya.