Nya setipak enggau polisi perintah Sarawak ti ngetuka pemansang ladang ti besai ba tanah negeri
DIkarang Rengenyan Labang
KUCHING: Urung 843,199 hektar tanah NCR udah dikemendar alai ngaga mayuh bengkah pemansang betanam betupi, lalu ari penyampau nya bisi 785,106 hektar tauka 93 peratus udah dikemansang.
Menteri Industri Pemakai, Komoditi enggau Pemansang Wilayah, Dato Sri Dr. Stephen Rundi Utom madahka nya setipak enggau polisi perintah Sarawak ti ngetuka pemansang ladang ti besai ba tanah negeri.
“Penyampau semua tanah NCR dianggar urung 1.5 juta hektar. Nyentuk ke diatu, urung 843,199 hektar tanah NCR udah dikemendar alai ngaga mayuh bengkah pemansang betanam betupi, lalu ari penyampau nya bisi 785,106 hektar tauka 93 peratus udah dikemansang.
“Batang tuju besai pemansang tanah NCR iya nya kena muka kandang endur menua ulu Sarawak enggau nambahka tikas sosio-ekonomi raban bansa Bumiputera ba kandang menua pesisir nengah mayuh bengkah model pemansang tanah NCR enggau program betanam betupi,” ku iya.
Iya madahka pelara nya lebuh ti nyimpul jurai Opis Menteri Industri Pemakai, Komoditi enggau Pemansang Wilayah (M-FICORD) maya baum DUN ti diatur ba Kompleks DUN Sarawak ditu, kemari.
Bejaku baru iya madahka M-FICORD deka chakah ngemansangka tanah asal enggau utai tanam pemakai ti berega tinggi, kena nempa peluang ekonomi baru rayat Sarawak.
Ku iya, opis menteri deka nempa kerejasama enggau komuniti menua tu, orang betanam enggau opis bukai ti bekaul ngena bagi utai tanam ti pemadu setipak ba tetiap kandang endut tanah NCR ke lebih agi ngena kebun mit ti bisi perambu chara besai enggau kebun mit.
Iya madahka pemansang ti dipejalaikan ngena chara kebun mit ti bisi perambu sereta chara besai, opis menteri udah bejalaika tiga model iya nya Ngaduka Projek, Usahasama enggau Model Suwa.
Ari baruh Model Ngaduka Projek ku iya, 64,358 hektar benung ditanam mayuh bengkah ejensi nyengkaum Lembaga Penyatuan dan Pemulihan Tanah Sarawak (SALCRA) (51,295 hektar ti bisi 21,141 penyereta), SLDB (626 hektar ti bisi 2017 penyereta) enggau FELCRA bisi 12,437 hektar ti bisi 2,668 penyereta.
Ba Model Usahasama , sepenyampau 93,202 hektar tanah NCR ba 48 kandang endur pemansang tanah NCR udah dikemansangka Syarikat Usahasama (JVC) enggau LCDA nyadi Pemegai Amanah ngarika sepenyampau 17,643 penyereta berejister.
Naka 31 Mac 2023, ku iya, Projek JV Pemansang Tanah NCR udah ngasilka RM519 juta Bayaran Deposit, Insentif Ninting Taun enggau Dividen ti udah dibayar ngagai pengempu tanah ke bisi ngambi bagi.
Nambahka nya, iya madahka SALCRA siti agi ejensi besai ti diberi tanggungpengawa mai transformesyen enggau ngangkatka komuniti menua pesisir nengah pemansang tanah NCR.
“Nyentuk bulan April 2023, SALCRA udah ngemansang enggau nanam ba 51,295 hektar tanah endur nanam sawit ba 19 ladang di bagi menua Kuching, Serian, Sri Aman enggau dalam Langgur iya nya Betong. Ari penyampau tu, bisi 26,628 hektar tauka 52 peratus udah tuai, 10,100 hektar (20 peratus) bedau tuai enggau14,567 hektar tauka 28 peratus dalam proses ditanam baru.
“Lalu, ari baruh Langgur Pemansang Malaysia Lumpar Ke-12 (Rolling Plan 4), SALCRA bisi minta nginjau RM10 juta ari perintah besai kena ngepunka pengawa nanam baru sawit ba bagi menua Sarikei enggau Sibu. Projek tu mungkur 6,400 hektar ti dianggar begunaka belanja RM153.60 juta ti deka nguntungka lebih 1,400 penyereta ari 70 genturung pendiau,” ku iya.
Kelimpah ari nya iya madahka M-FICORD majak meransang pengempu tanah NCR ngemansangka tanah nengah mayuh bengkah program promosyen baka Dialog Pemansang Tanah NCR, Ekspo Pertanian, Program AgriCOP enggau Seminar Transformesyen Betanam Betupi.
“Naka ke diatu opis menteri aku udah ngerejister 124 peminta ari pengempu tanah, nengah Komiti Pemansang Kandang Endur (ADC) tauka Komiti Pemansang enggau Pengelikun Genturung Pendiau (JKKK) ngemansangka tanah sida ti mungkur 422,350 hektar.
“Nyentuk ke diatu, 53 peminta ti mungkur 121,000 hektar udah dikemendar nyadi pemansang tanah NCR,” ku iya.