KUCHING: Sarawak begunaka agih belanja RM19.2 bilion dikena ngaga semua projek bekal ai kena nangkup peminta bekal ai ungkup timpuh panjai.
Menteri Utiliti enggau Telekomunikesyen Datuk Julaihi Narawi madah, ke tuju nya opis menteri iya mantaika Perambu Atur Pemansang Malaysia Lumpar ke-12 (RMK12) ti beungkus RM5.9 bilion kena neruska pengawa ngaga projek bekal ai baka ti diperambu di Sarawak.
"Beratika penyampau agih belanja kena ngaga projek bekal ai mayuh amat, aku minta Perintah Besai nyendiaka agih belanja ti chukup sereta ukai semina bepanggai ba agih belanja ari Perintah Sarawak kena mutarka isu bekal ai di Sarawak," ku iya.
Iya madah m,unyi nya maya nutup jurai Opis Menteri Utiliti enggau Telekomunikesyen maya Aum Kunsil Negeri (DUN) ditu, kemari.
Ku Julaihi, penyampau peminta ai diatu di negeri tu iya 2,000 MLD (Juta Liter Ai Sehari) lalu dipelabaka peminta ai ba taun 2030 iya nya 2.400 MLD.
Nya alai ku iya, sekeda projek besai kritikal mesti dipejalaika lengkas kena ngisi peminta ai ti dijangka tmajak nambah.
Ba timpuh ke sama ku iya, Sarawak mesti bisi rizab margin air ti chukup ba penyampau abis nadai 20 peratus (ari kapasiti loji ai beresi).
Ku iya, antara projek kritikal nya baka sistem bekal ai baru di Landeh (Kuching) enggau Mukah, loji meresi ai baru tauka ngemanahka agi di Engkilili (Sri Aman), Kaki Wong (Saratok), Salim enggau Kanowit (Sibu), Song enggau Kapit, Beluru (Miri), Lawas enggau sistem pemansut ai mata Nyabau (Bintulu).
"Ke penemu rama Kaban Dewan Yang Mulia tu, rizab margin Loji Meresi Ai Salim di Sibu naka ke diatu semina bisi tiga peratus, Loji Meresi Ai Batu Kitang di Kuching lima peratus enggau Loji Meresi Ai Kaki Wong di Betong satu peratus aja," ku iya.
Sentang prestasi ke diatu bungkur bekal ai di negeri tu, Julaihi madahka naka suku keterubah taun tu iya nya 84.1 peratus ke alai 67.8 pratus menua pesisir lalu 99 peratus di mengeri.
Opis Menteri Utiliti enggau Telekomunikesyen ku iya, deka majak komited sereta chakah agi pengawa ngaga pemansang infrastruktur bekal ai kena nyapai tagit bungkur penuh manggai ba taun 2030 bepesarka Pelin Besai Bekal Ai enggau Grid Ai Sarawak.
Ku iya, ungkup timpuh pandk, nengah Pelin Besai Bekal Ai,Perintah Sarawak ngungkupka RM4 bilion dikena ngaga 'Sarawak Water Supply Grid Programme for Stressed Areas' ti mungkur 298 projek nyengkaum Bekal Air Alternatif Sarawak (SAWAS).
"Nyentuk ke diatu, 229 projek tauka 76.8 peratus arisemua projek udah tembu digaga lalu 52 projek dijangka tembu digaga dalam taun tu lalu 12 iti agi dijangka tembu taun 2024.
"Laluh lima iti agi projek dalam renggat tinda ti dipelabaka berengkah digaga dalam taun tu," ku iya.
Ku iya program 'Sarawak Water Supply Grid Programme for Stressed Areas' udah meri empas besai kena mutarka penanggul bekal ai ti serius enggau penanggul ai kelebih agi di menua pesisir Sarawak.
Program tu ku iya, mungkur skop besai antara 15 loji meresi aiti dikemanahka agi, 42 stesen pam 'booster' enggau 58 tangki ai tinggi baru enggau batang paip sepemanjai 1,969 kilometer (km).
Kelimpah ari nya, 14 pakej SAWAS dalam fasa 2 ari baruh program tu udah tembu lalu laluh lapan iti agi pakej benung digaga ti deka meri penguntung ngagai 1,548 ruang bilik, ku iya.