Anda di sini

MAIS berengkah ngaga undang - undang bekaul nikah enggau adat sarak: Sikie

Advertisement

Undang-undang ti diperambu tu nyengkaum ungkup sumpah tikah, rejister nikah sereta kapasiti enggau ditagang nikah

Sikie mandangka teks jaku nutup jurai iya maya Aum DUN kemari. - Gambar Roystein Emmor
Sikie mandangka teks jaku nutup jurai iya maya Aum DUN kemari. - Gambar Roystein Emmor

KUCHING: Opis Kunsil Penyimpan enggau Penusun Adat Negeri Sarawak (MAIS) udah ngambi singkang tumu ngaga  undang-undang bekaul enggau nikah enggau adat sarak. 

Menteri ba Opis Premier Sarawak Datuk John Sikie Tayai madah, undang-undang ti diperambu tu nyengkaum ungkup sumpah tikah, rejister nikah sereta kapasiti enggau ditagang nikah.

“Deka bisi diungkupka khas kena nyaga sereta ngemata pengawa nikah ke ari baruh umur,” ku iya lebuh ke nutup jurai maya Aum Kunsil Negeri (DUN) kemari. 

Kaban Kunsil Negeri (ADUN) Pending Violet Yong nengah penerang berita iya sebedau tu minta Perintah Sarawak bejalaika atur lengkas beritka undang-undang ke bisi diatu kena nagang tikah nembiak mit. 

Yong mega minta MAIS minta pemendar semua ketuai raban bansa nambahka umur tau nikah ngagai 18 taun dalam bulan Julai 2023. 

Berebak enggau nya, Sikie madahka MAIS udah ngepunka projek pemansang baru Sistem Elektronik Tikah Adat (NAMES) ngagai versyen ti manah agi iya nya NAMESv2. 

Sistem baru tu ku iya, deka dikena dalam bulan Jun taun tu ambika mensia mayuh ulih ngaga pra-rejister tikah adat sechara online nengah postal rasmi Perintah Sarawak ngena SarawakID. 

“Ungkup pra-rejister servis kaunter, tau digaga ba 45 buah opis pelilih menua enggau 22 buah opis pelilih mit diserata Sarawak,” ku iya. 

NAMESv2 ku Sikie, mega bisi nyendiaka rikod rejister tikah adat enggau adat sarak ti suah dipinta opis menteri enggau ejensi perintah ke bekaul kena ngaga polisi enggau program perintah. 

Advertisement