KUCHING: Program Dua Jaku (DLP) ti disediaka Opis Menteri Pelajar, Inovesyen enggau Pemansang Bakat udah dipejalaika enggau lanchar, lalu 5,200 iku pengajar udah dilatih ngajar subjek Sains enggau Matematik dalam jaku Inggeris.
Menteri Pelajar, Inovesyen enggau Pemansang Bakat Datuk Roland Sagah Wee Inn madah, perati nya dipejalaika ba 3,111 guru ari 5,200 pengajar ti dilatih nengah program nya.
“Program tu berengkah dalam taun 2019 lalu kitai diatu udah ba renggat primari empat lalu empas iya semina deka ditemu kitai enti sida masuk form empat.
“Nya alai kelalu tumu madahka empas iya, tang kitai semua ngarapka ti pemadu manah,” ku iya madah maya aum media pengudah nutup jurai ungkup opis menteri iya maya Aum Kunsil Negeri (DUN) Sarawak, kemari .
Ngenang baru pasal DLP, Sagah madahka semina Sarawak aja negeri ti ngajar Sains enggau Matematik dalam jaku Inggeris ba semua 1,265 sekula sekondari.
Latih keterubah dipejalaika dalam taun 2019 ke alai pesereta dipilih aribala pengajar Sains enggau Matematik nithka pengelandik sida dalam jaku Inggeris nyengkaum pengajar ukai opsyen.
Ungkup pengajar ukai opsyen ku iya,sida dipilih nitihka gaya sida dalam Sains enggau Matematik ti dianggap tau ngajar dua subjek ari Opis Pelajar Sarawak taja pan nya ukai pakar ba nya.
Latih enggau peakran pelajar DLP ku iya, ditentuka Opis Pelajar Sarawak enggau Institut Pematih Pengajar Malaysia pengelama empat hari tiga malam ungkup guna ba semua modul ti ngembuan isi ti intensif.
DLP ku Sagah, dipelanja Perintah Sarawak magang nyentuk ke diatu, program latih tu udah nerima RM15 juta kena nampung belanja perengka dikena ngajar enggau belajar, latih enggau pekara bukai.