Penembu jalai alun tu deka meri empas ngagai ekonomi peranak di menua pesisir
“Tu deka ngemandakka timpuh pejalaitang ti pemadu beguna iya nya empas ngagai ekonomi tu besai ari sukut betanam beupi enggau mega dagang temuai,”
Datuk Patinggi Tan Sri Abang Johari Tun Openg
Premier Sarawak
KUCHING: Pejalai ari Gedong ke Kampung Semalatong, Simunjan deka dampih agi iya nya bisi 25 minit timpuh pejalai sepengudah pengawa ngangkatmanah jalai ladang ke udah bisi diatu 26 kilometer (km) nya tembu ila.
Premier Sarawak Datuk Patinggi Tan Sri Abang Johari Tun Openg madahka pengawa ngangkatmanah jalai ladang ke udah bisi diatu nya mega ngaul pengawa ngaga dua buah jematan semin enggau ungkus semua nya sepenyampau RM250 juta.
“Kampung Semalatong tu ba Ulu Simunjan enggau Ulu Gedong ti bisi lebih sejam timpuh pejalai ngena jalai alun ke diatu nengah Serian enggau Jalai Besai Pan Borneo.
“Berindik ari nya kitai udah berandau lalu ungkup pemaik rayat di menua pesisir kelebih agi di kandang menua tu, nya alai kitai udah bejalaika projek tu enggau ungkus RM250 juta.
“Tu deka ngemandakka timpuh pejalaitang ti pemadu beguna iya nya empas ngagai ekonomi tu besai ari sukut betanam beupi enggau mega dagang temuai,” ku iya.
Iya madah munyi nya lebuh ti bejaku ba Pengerami Nasih Tanah Ngambi enggau Ngangkatmanah Jalai Ladang Diatu ari Gedong ke Kampung Semalatong, Simunjan di Gedong kilah ensana.
Beserimbai enggau tu, Sapit Premier Datuk amar Douglas Uggah Embas madah projek tu dikemendarka enggau agih belanja RM250 juta lalu iya ngarapka Opis Kereja Raya (JKR) deka bebendar dalam nentuka projek tu ulih tembu dalam timpuh 36 bulan.
Skop projek tu ku iya ngaul keterubah, pengawa ngangkatmanah enggau ngaga jalai premix standard-R3 semanjai 26 km ti nyambung Kampung Gedong enggau Kampung Semalatong.
Skop projek kedua ku iya ngaul pengaga ngaga dua ejmatan semin semanjai 71.8 meter di Sungai Simunjan Kanan lalu 29.4 km di Sungai Spaoh.
Lali skop pengawa ti ketiga ngaul pengawa ngaga parit, perabot jalai enggau tanah.
“Enggau pemisi rentayan jalai alun tu, penyauh pejalai semina 26 km ari Kampung Gedong ke Kampung Semalatong.
“Lebuh jalai tu tembu ila, nya deka mantu ngemandakka pejalai sereta mantu ari sukut ekonomi ke alai tanah peranak di kandang menua nya ulih dikereja,” ku iya.
Dalam pekara ti bekaul, Uggah ti mega Menteri Infrastruktur enggau Pemansang Palan Penyangkai Kapal madah mayuh jalai benung digaga di nengeri tu ari perintah Sarawak.
Keterubah ku iya, Jalai Tebing Pantai semanjai 370.8 km ari Sempadi, Lundu ke Niah, Miri enggau ungkus RM5.420 bilion, Jalai Besai Kedua ari Jematan Batang samarahan ke Sri Aman enggau ungkus RM4.978 bilion sereta 700 km jalai ari baruh projek rayat nyengkaum 20 jematan enggau ungkus RM4.978 bilion.
Tu ku iya, nyadika kelai bakani Premier ngatur dikena nentuka rayat di menua pesisir mega enda tinggal.