MIRI: Pengawa ngatur pengerami tauka festival pemakai iya nya entara pengawa dalam ngelakuka sereta ngangkatka dagang temuai menua tu, pia ku Menteri Perengka Pengangkut Sarawak Dato Sri Lee Kim Shin.
Ku iya, pengawa baka tu mega ulih terus mantaika produk menua tu ukai semina ngagai komuniti di kandang menua nya, tang ngagai sida ti datai ari kandang menua bukai.
“Baka mengeri Miri, kitai bisi mayuh macham bansa pemakai ti narit ati sereta nyamai ulih diasai lalu ulih nyadi sebagi ari strategi dagang temuai dikena matak penatai temuai ti rinduka pemakai.
“Dalam berapa taun ti udah, mayuh mega bala nembiak kitai ngaul diri enggau industri pemakai enggau ai irup.
“Tu chukup manah laban sida ngayanka pengerindu dalam industri dagang lalu pia mega sama ngelakuka pemakai enggau ai irup. Nya alai, ambi sebarang peluang ti bisi nyendiaka program ngelakuka pemakai tauka ai irup ngambika ulih nyual produk diri empu,” ku iya.
Lee madah munyi tu ngagai pengarang berita pengudah bejadi 'Miri Food Festival' ba palan ngengkahka entukar di palan bebeli barang Boulevard Hypermarket Pujut, kena lemai Hari Lima.
Beserimbai enggau tu, Lee mega ngansak raban ti bejalaika sektor pemakai sereta gerempung ukai dikuasa perintah (NGO) ditu ngambika begulai lalu ngatur pengerami pemakai ti ulih nyadi program khas ke ulih matak pengerindu di Miri, baka 'Kuching Food Festival'.
“anang takut deka berengkah ari mit, nya ulih ngerembai. Ari Mit deka nyadi besai, nama ti pemadu beguna iya nya pengeransing kita dalam ngepunka singkang,” ku iya nyemetak.
Miri Food Festival tu dipejalaika ari 18 nyentuk 28 Mei beserimbai enggau 'Miri May Fest' ti bisi nyendiaka 100 bansal bejual pemakai ti bisi mega mantaika lebih ari 500 bansa pemakai sereta ai irup.