Kelebih agi di menua pesisir ti ukai semina ngemanahka bungkur Internet tang mega ngurangka ungkus ngaga menara
“Tadi (Kemari) aku berandau enggau Datuk Dr Abdul Rahman Junaidi (Sapit Menteri Utiliti enggau Telekomunikasyen), kitai bisi tangki ai tikas tinggi, ukai semina ulih endur nimbun ai tang mega ungkup tuju Internet.
Datuk Patinggi Tan Sri Abang Johari Tun Openg
Premier Sarawak
KUCHING: Perintah Sarawak ngelangkar deka ngengkahka 'antena' ba tangki ai ti bisi ba endur ke tinggi dikena ngemanahka bungkur internet kelebih agi di kandang menua pesisir.
Premier Sarawak Datuk Patinggi Tan Sri Abang Johari Tun Openg madahka inisiatif tu ukai semina ulih ngangkatka bungkur internet tang mega ngurangka ungkus ngaga menara.
“Tadi (Kemari) aku berandau enggau Datuk Dr Abdul Rahman Junaidi (Sapit Menteri Utiliti enggau Telekomunikasyen), kitai bisi tangki ai tikas tinggi, ukai semina ulih endur nimbun ai tang mega ungkup tuju Internet.
“Aku deka minta Perbadanan Ekonomi Digital Saraak (SDEC) dikena ngengkahka antena Internet tu, enda ibuh begagaka menara agi,” ku iya.
Iya madah munyi tu ba aum media pengudah Pengerami Nasih Tanah Projek Jalai Gedong ke Kampung Semalatong, Simunjan di Gedong kemari.
Bejaku silik bekaul pekara tu, Abang Johari madahka, inisiatif ti pemadu baru tu deka ngurangka ungkuss perintah dalam nyendiaka Internet ti enda begunaka belanja lebih ungkup ngaga menara.
“Tu iya nya pekara ti enda terunding dalam pengawa kitai ngemanahka infrastruktur pemun di kandang menua pesisir.
“Guna nya sama enggau menara telekomunikasyen, tang begunaka tangki tikas tinggi kelimpah dikena nimbun ai,” ku iya.
Dulu ari tu dalam jaku iya madah, perintah diatu ngena teknologi baru solar nyengkaum hibrid solar dalam mekalka elekterik ngagai genturung pendiau sereta rumah panjai di kandang menua pesisir.
Pia mega ungkup bekal ai, ku iya, penanggul nya diatu iya nya tikas pengelaju ai ti kelalu laju ti ngujungka paip ti magi bekal ai ke genturung pendiau pechah lalu patut diubah.
“Kitai mega deka ngiga pun pemisi ai baru ungkup bekal ai ke kandang menua pesisir lalu dalam timpuh nyentuk taun 2030 semua tu deka ulih diputar, reti nya Sarawak nyadi sebagi agi kandang menua ti chakah mansang di Malaysia ba taun 2030,” ku iya.
Pengudah pengerami tu, Abang Johari udah ngatur program ngelawa ke projek ngangkatmanah bekal ai d Kampung Sageng enggau Kampung Kelka di Sekula Primari (SK) Sageng, Simunjan.