Anda di sini

Penyerakup kunchi ngemujurka juluk Sarawak nyadi negeri maju

Advertisement
Uggah (tengah) begambar kenang enggau bala peseretake enggau maya Program Aram Nemuai ba Rumah Mendit, Spaoh kemari.
Uggah (tengah) begambar kenang enggau bala peseretake enggau maya Program Aram Nemuai ba Rumah Mendit, Spaoh kemari.

KUCHING: Penyerakup rayat endang nya kunchi besai kena nentuka Malaysia kelebih agi Sarawak majak nyingkang ke mua sereta ulih besemekih nyadi negeri maju.

Sapit Premier Sarawak Datuk Amar Douglas Uggah Embas  madah, Sarawak nyadi model penyerakup ti pemadu manah di  menua tu ke mega nyadi penegap ba pengawa ngemujurka juluk nyadi negeri maju.

"Jemah ila mar amat laban kita nemu sesebuah menua amat pedis enti nadai pengelikun.

"Nya alai endang nyadi tanggungpengawa kitai nentuka ulih nampung nyaga pengelikun enggau penyerakup ti dikemeratka bala ketuai ke suba," ku iya.

Iya bejaku munyi nya maya Bejadi Program Aram Nemuai ti diatur Unit Komunikesyen Perintah Sarawak (UKAS) ba Rumah Mendit, Penom Ulu Paku di Spaoh, kemari.

Sama bisi maya nya, Kaban Parlimen Betong Dr Richard Rapu, Residen Bagi Menua Betong Richard Michael Abunawas, Sekretari Politik Premier Sarawak Roseline Mapong Sabai, Direktor UKAS Samuel Simon, Yang Dipertua Majlis Perwakilan Pelajar UNIMAS Mohd Azahari Ariful Amiruddin, Tuai Rumah Mendit Unsu enggau bala temuai ke bukai.

Uggah ke mega kaban Kunsil Negeri (ADUN) Bukit Saban madah, Sarawak ke deka nyapai merdeka ke 60 taun dalam Malaysia, udah mujur mandangka diri ulih napi pemar enggau manah.

"Dalam timpuh nya, Sarawak komited agi dalam Malaysia.

"Nya alai aku ngarapka rayat terus bejalaika pengawa enggau tanggung ambika Malaysia terus maju jemah ila," ku iya.

Bekaul enggau Program Aram Nemuai 40 iku nembiak  Universiti Malaysia Sarawak (UNIMAS) nya, Uggah arap amat bala nembiak nya deka bulih peneleba ke berega nengah Program Anak Iru ti diatur ba Rumah Mendit nya.

"Aku ngarapka bala nembiak bulih peneleba ngasaika diau ba rumah panjai.

"Kena mih peluang tu kena meretika pangan diri kelebih agi ba budaya rayat Malaysia enda ngira bansa.

"Aku arap amat pengelebih tu ulih nempa kita nyadi ketuai jemah ila," ku iya. 

Ba pengerami nya, Samuel madahka sida ngatur Program Aram Nemuai ti keterubah endar begulai enggau 40 iku nembiak ari UNIMAS.

"Program UKAS ke sekali tu lebih fokus ngaul raban rebak biak ke mega lalu ngenegapka kaul enggau kerejasama entara UKAS enggau institut pelajar perintah enggau peribit. 
 
"Kelimpah ari nya, nengah program tu mega kitai ulih ngiri penemu ngagai rebak biak ambika ngemeranka  pemanah ba raban bansa  sereta mandangka chara sechara terus sentang chara bejalaika program," ku iya.
 

Advertisement