Penemuai aku ke Sarawak mandangka pengeran deka mutarka penanggul ti ditapi kelebih agi isu internet
“Tuju aku datai sereta nemuai rasmi ngagai Premier Sarawak laban deka mansik penanggul ti ditapi rayat Sarawak kelebih agi bekaul enggau internet”
Fahmi Fadzil
Menteri Komunikesyen enggau Digital
Dikarang Rengenyan Labang
KUCHING: Opis Menteri Komunikesyen enggau Digital (KKD) deka lebih ngenati sereta mutarka penanggul infrastruktur telekomunikesyen di negeri tu enggau lengkas .
Menteri opis nya, Fahmi Fadzil madahka penanggul nya sekeda ari pekara ti deka dirandau enggau Premier Sarawak Datuk Patinggi Tan Sri Abang Johari Tun Openg.
“Tuju aku datai sereta nemuai rasmi ngagai Premier Sarawak laban deka mansik penanggul ti ditapi rayat Sarawak kelebih agi bekaul enggau internet.
“Ba parlimen bulan Mac tu tadi, kami bisi minta kaban parlimen ari semua negeri nyengkaum Sarawak madahka nama penanggul ti ditapi ba sitak parlimen sida. Nya alai penemuai aku kitu (Sarawak) mandangka pengeran deka mutarka penanggul ti ditapi kelebih agi isu internet.
“Sekeda penanggul infrastruktur, baka isu bisi tiang pemanchar tang nada mangkuk pemanchar. Tu entara pekara ke endang ditemu kami nya alai sehari tu penemuai basa nyadi peluang mansik sekeda pekara enggau mutarka enggau lengkas,” ku iya.
Fahmi dirandau pekara nya pengudah iya nemuai seraya berandau enggau raban Media Sarawak ba Bilik Media, Kompleks DUN Sarawak ditu, kemari.
Ngenang tiang pemachar di Sarawak, iya madahka lebih 600 tiang telekomunikesyen digaga Perbadanan Ekonomi Digital Sarawak (SDEC) sereta kurang ari setengah ti udah bisi Mobile Network Operator (MNO) tauka telco ti udah beoperesyen.
“Bisi sekeda tiang tu ba kandang endur ti bisi bungkur 4G, diatu kitai deka nambahka fasiliti, laban bisi sekeda endur nadai kena bungkur 4G.
“Nya alai kami benung mansik sekeda chara dikena mutarka penanggul tu enggau lengkas nyengkaum minta MNO tauka kompeni telco sereta Opis Komunikesyen enggau Multimedia (SKMM) madah ngagai perintah,” ku iya seraya madahka pekara nya deka dipadah enda lama agi.
Kelimpah ari nya, Fahmi ngenang bekaul enggau pengawa nyual tiket konsert raban Coldplay di menua tu, iya ngelalau mensia mayuh nyema deka meli tiket enda ngira konsert ti diatur ba menua, tu patut meli nengah jalai ti betul sereta rasmi.
Iya madah, digital nyadi platform ‘ulat tiket’ lalu SKMM deka berati tauka mansik sereta neritka undang-undang ti patut.
“Aku deka ngena peluang tu meri jaku tangkan, nyema bisi sekeda ti deka meli tiket konsert, enda ngira bagi konsert, beli tiket ari jalai ti betul, rasmi, chara tu ulih nyeliahka ari penanggul ‘ulat tiket’,” ku iya.