Bisi urung 400 projek ke dilanggur deka dikemansang ari taun 2023 - 2030 begunaka belanjaka urung 17 bilion
Dikarang Rengenyan Labang
KUCHING: Ejensi Pemansang Delta Rajang (RADDA) deka mantaika Strategi Pemansang RADDA 2023 - 2030 ti begunaka belanja urung RM17 bilion ngagai Premier Sarawak, sehari tu.
Chairman RADDA,Datuk Len Talif Salleh madah Kaban Komiti Pemandu RADDA meri penemuai basa ngagai Premier Sarawak Datuk Patinggi Tan Sri Abang Johari Tun Openg dipelaba urung tengah hari sehari tu.
Nitihku Len Talif, komiti iya deka mantaika urung 400 lis projek ke dilanggur sereta deka dikemansang ari taun 2023 ngagai 2030.
"Pagila (Sehari tu) kami RADDA bisi nemuai meri basa ngagai Premier Sarawak, lalu tu (penemuai) ti keterubah ari kami.
"Bisi urung 400 projek dalam tu (Strategi Pemansang RADDA 2023 - 2030) ti begunaka belanja urung RM17 bilion.
"Taja pia penyampau ungkup belanja ke diungkup ngagai kami (RADDA) semina RM1.5 bilion dikena ngemansangka (RADDA), nya alai kitai deka ngaga projek ke patut dulu digaga," ku iya ngenang pandak pekara nya.
Sapit Menteri Pemansang Mengeri enggau Pengeraja Asal tu mantaika pekara nya nyerumba aum pengarang berita nyuaka pemeri Opis Pemansang Induastri Kayu Ramu Sarawak (PUSAKA) enggau anak kompeni iya ngagau peranak Tanjung Manis ti diatur ba opis iya di Wisma Sumber Alam ditu, kemari.
Iya madah projek ke dilanggur dalam Strategi Pemansang RADDA 2023-2030 iya nya projek ke udah dikerandau sereta dilanggur bala pengari rayat.
RADDA tu mungkur kandang endur pemesai 11,330 kilometer persegi ti bisi urung 300,000 peranak.
RADDA tu mega bisi nyengkaum 11 sitak Kunsil Negeri (DUN) iya nya Kuala Rajang, Semop, Daro, Jemoreng, Repok, Meradong, Pakan, Meluan, Balingian, Dalat enggau Telian ti di dalam lima sitak Parlimen iya nya Mukah, Igan, Tanjung Manis, Sarikei enggau Julau.