Form 6 iya nya peresa STPM ti disediaka Opis Menteri Pelajar (KPM) setipak enggau Akta Pelajar 1996
"Aku ke nyadi pengajar, aku setuju enggau Menteri Pelajar, Fadhlina Sidek ke alai STPM patut dipajak. Kebuah pia, laban STPM diaku IPTA (institusyen pelajar tinggi perintah), IPTS (institusyen pelajar tinggi peribit), enggau antarabansa baka GCE (Sijil Am Pelajaran) 'Peringkat Lanjutan' di UK.”
Kullin Djayang Presiden
Gerempung Pengajar Sarawak (STU)
SIBU: Gerempung Pengajar Sarawak (STU) arap bendar Sijil Tinggi Persekolahan Malaysia (STPM) agi relevan sereta patut majak dipejalaika.
Presiden STU, Kullin Djayang madah ngetuka peresa perintah ti dipejalai sereta di serata menua tu deka meri mayuh pengerugi.
Iya madahka pekara nya lebuh ti ngenang penerang Menteri Pelajar Fadhlina Sidek ti madah enda patut ngetuka Form 6 enggau STPM maya nyimpul jurai jaku Diraja di Dewan Negara Hari Satu.
Fadhlina madah, Form 6 iya nya peresa STPM ti disediaka Opis Menteri Pelajar (KPM) setipak enggau Akta Pelajar 1996 lalu meseti dipejalai sereta diteruska.
"Aku ke nyadi pengajar, aku setuju enggau Menteri Pelajar, Fadhlina Sidek ke alai STPM patut dipajak. Kebuah pia, laban STPM diaku IPTA (institusyen pelajar tinggi perintah), IPTS (institusyen pelajar tinggi peribit), enggau antarabansa baka GCE (Sijil Am Pelajaran) 'Peringkat Lanjutan' di UK.
"Kelimpah ari nya, saut nembiak diperesa pemeresa khas ari sekula ke enda sama ari sekula chalun, dibanding enti peresa nya diperesa pengelicha tauka pengajar nya empu," ku Kullin.
Nitihku Kullin, enda ulih dikeenggai pengajar mayuh peneleba dalam nentuka pemutus nembiak nyulut ba STPM, seraya meri manah agi peluang ngagai nembiak nampung pelajar ba dalam tauka menua tasik.
Kullin madah, laban STPM semina tiga semester, iya entara jalai pandak nembiak nampung pelajar ngagai renggat pelajar tinggi.
Ba timpuh ti sama, STPM bepalan ba sekula ti dipelanja perintah lalu tu meri peluang ngagai semua nembiak nyengkaum ari ruang bilik B40, tau ngambi peresa nya.
"Enti matrikulesyen, tentu begunaka belanja besai lalu mayuh nembiak enda ulih, enggau nya sida lalu tinggal ari nampung pelajar ngagai renggat tinggi.
"Langgur penemu ngagai KPM, nyema subjek ti diajar dalam STPM kurang relevan enggau jeman ke diatu tauka kurang ba markit (kereja), opis menteri tau meri langgur subjek bukai ti patut ke pemansang pelajar menua sereta mega mantu STPM ti lebih bekualiti.
"Semua tu bisi agi pematut ari ngetuka STPM. Enggau terang aku madah, ba penemu aku, ngetuka STPM siti pekara ti chukup ngerugi lalu udah tentu enda patut naka ke diatu," ku iya madah nyemetak.
Maya sesi bejuraika jaku Diraja nya, Senator Datuk Dr. Dominic Lau Hoe Chai udah meri langgur penemu ngagai perintah ambi ngetuka STPM sereta diganti ngena program matrikulesyen.