Anda di sini

STPM agi patut diangkatka manah agi: KGBS

Advertisement
ZULKIFLEE
ZULKIFLEE

KUCHING: Sijil Tinggi Persekolahan Malaysia (STPM) tauka Form 6 agi relevan sereta patut diangkatka enggau manah agi, ukai diketu.

Presiden, Gerempung Pengajar Bumiputera Sarawak (KGBS) Zulkiflee Sebli madahka gerempung sida bepenemu, STPM enda patut diketuka ke diatu laban agi relevan sereta nyadi siti syarat nampung pelajar ngagai institusyen pelajar tinggi (IPT).

Iya madahka belajar pengelama dua taun ba renggat nya enda sebaka enggau matrikulesyen sereta meri pengelebih ngagai nembiak ke tembu STPM tauka Form 6.

"Agi bisi pematut peresa STPM tu ba bala nembiak. Silibus sida mayuh nuju ngagai dikena nyikap sida nyadi nembiak universiti.

"Nya alai patut mega sida tu diaku nyadi nembiak Pra - universiti. Diaku antarabansa, pelajar Form 6 tu udah tentu dikena nyikap nembiak nampung pelajar sida.

"KGBS bebendar madah enda setuju nyema bisi langgur penemu deka ngetuka Form 6 enggau STPM," ku iya lebuh dirandau Utusan Borneo, kemari.

Iya meri timbal nya seraya setuju enggau penerang ari Menteri Pelajar, Fadhlina Sidek ti madah nadai pematut ngetuka STPM tauka Form 6.

Form 6 Tu peresa STPM ti disediaka Opis Menteri Pelajar (KPM) setipak enggau Akta Pelajar 1996 enggau diberi jamin meseti ditumbuh sereta diteruska.

Zulkiflee madahka STPM ukai patut diketu tang patut diangkatka manah agi.

"Ke patut, pelajar Form 6 tu patut diangkatka agi status awakka nembiak lebih komited nyapai penyulut ba renggat tinggi sistem sekula ba menua kitai," ku iya.

Nambah nya, iya madahka raban pengajar ti ngajar Form 6 patut disukung sereta disediaka kereban ti manah awakka ulih nempa nembiak ngembuan ulah manah sereta sedia ke IPT.

KPM patut lebih ngenatika bala pengajar enggau nembiak form 6 ngambika timpuh dua taun pelajar sida meri empas besai ba pengawa nempa sida kena ngemansangka menua.

Ku iya, pansik nambahka insentif khas bekaul enggau pengelantang pengajar Form 6 patut setipak enggau pekara STPM ke diaku ba renggat antarabansa.

"Nyadi sebengkah gerempung pengajar, KGBS seruran nuju ke mua ke pengelantang pengajar. Nyaga pengelantang pengajar, raban pengajar deka lebih ngenatika kereja sida ti ngajar anak bansa.

"Kitai meri terima kasih sereta gaga ati ke pengelebih bala pengajar ti ngajar Form 6," ku iya.
 

Advertisement