KUCHING: Program kus khas baru deka dibantaika di Universiti Malaysia Sarawak (UNIMAS) dikena matih bala pengajar ti ulih nemu potensial bala nembiak mit ari renggat tumu umur sida.
Premier Sarawak Datuk Patinggi Tan Sri Abang Johari Tun Openg madahka iya udah berandau enggau Mandal Canselor Prof Datuk Dr Mohamad Kadim Suaidi dikena numbuhka kus didiplin baru di UNIMAS kemari.
“Raban UNIMAS deka ngaga pengawa mansik bekaul kus khas tu ngambika kitai ulih ngadaka pengajar ti bisi latih ari sukut psikologi enggau polisi sereta ulih nemu potensial bala anak.
“Nya alai kitai patut ngadaka pengajar ti bisi latih dalam pekara tu dikena nentuka kitai matih bala anak ari renggat tumu umur sida dalam kus ti sida temu manah ungkup sida,” ku iya.
Iya madah munyi nya ba aum media pengudah bejadika 'Sambutan Hari Wanita 2023' di Pusat Konvensyen Penview (PCC) kemari.
Dulu ari nya dalam jaku iya, Abang Johari madah pengudah program tu dikemendar Senat UNIMAS, perintah nengeri deka meri skularship ngagai pengajar ti deka dilatih.
Pengawa baka tu ku iya udah digaga ba sekeda menua Skandinavia ke alai sida ngembuan populasyen ti mit tang ngembuan pemisi pengereja pengawa ti bisi kualiti.
“Kitai ngembuan populasyen 3 juta lebih lalu kitai begunaka populasyen ti bisi kualiti di nengeri maju di Malaysia datai ba taun 2030,” ku iya.
Ba pengerami tu, Abang Johari madahka perintah nengeri sedia deka ngangkatka Geran Modal Ngenegapka Orang Indu ngagai RM2.5 juta dikena ngena enggau naka ulih 2,500 iku orang indu ti ulih.
Abang Johari mega setuju deka ngadaka Pusat Pengumpulan Sehenti (OSCC) khas ungkup orang indu di Kota Samarahan dikena ngemunaska penyeranta lalu ngangkatka tikas orang dagang orang indu B40 ke renggat global.
Pekara bukai ti deka dipesetuju, ungkup Opis Menteri Pemansang Orang Indu, Nembiak Mit enggau Pengelantang Komuniti bejalaika pengawa mansik dalam nyikap diri nuju nengeri tuai ba taun 2028.
Pansik tu deka dipejalaika opis menteri begulai enggau Unit Ngelangkar Ekonomi (EPU).
Bekaul enggau Ordinan Majlis Sosial, ku iya madah deka minta pengawa mansik digaga Luyar Nengeri nyengkaum pekara bekaul enggau opis menteri tu dalam Komiti Pengereja Pengawa Perintah (SPA).
Bekaul enggau penumbuh kerusi dikena ngemansangka ketuai orang indu mega, Abang Johari madah tu ulih ditumbuhka di universiti Sarawak sekalika di Universiti Teknologi Sarawak (UTS), Universiti Swinburne, Universiti Curtin tauka iCATS.
Pengerami Hari Orang Indu tu mega udah diatur enggau pengawa nyuaka lima gelar iya nya 'Anugerah Premier Sarawak Kepimpinan Wanita', 'Anugerah Premier Sarawak Keusahawanan Wanita', 'Anugerah Premier Sarawak Penggiat Sosial Wanita', 'Anugerah Premier Sarawak Pencapaian Khas' enggau 'Anugerah Premier Sarawak NGO Cemerlang'.
Sama datai Sapit Premier Sarawak Dato Sri Dr Sim Kui Hian, Menteri Pemansang Orang Indu, Ruang Bilik enggau Komuniti Malaysia Dato Sri Nancy Shukri, Menteri Pemansang Orang Indu, Nembiak Mit enggau Pengelantang Komuniti Dato Sri Fatimah Abdullah enggau bala bukai.