Dikena mutarka penanggul penusah ampuh bah tunggal ti suah nyadi pengudah ujan ti enda ngetu
“Kemaya hari tu kitai bepanggai ngagai geran ari perintah besai lalu nama ti patut digaga iya nya ngembuan pelin besai standard bekaul enggau entali ai lalu tu begunaka timpuh lima nyentuk 10 taun,”
Datuk Patinggi Tan Sri Abang Johari Tun Openg
Premier Sarawak
KUCHING: Pelin besai standard bekaul entali ai diguna ungkup mutarka penanggul penusah ampuh bah tunggal ti suah nyadi lebuh ujan ti enda ngetu di nengeri tu kelebih agi di kandang mengeri besai.
Premier Sarawak Datuk Patinggi Tan Sri Abang Johari Tun Openg madahka iya udah nyebut bekaul enggau pengawa mansik ti mungkur semua digaga bekaul enggau sistem entali ai tang tu begunaka belanja ti besai.
“Kemaya hari tu kitai bepanggai ngagai geran ari perintah besai lalu nama ti patut digaga iya nya ngembuan pelin besai standard bekaul enggau entali ai lalu tu begunaka timpuh lima nyentuk 10 taun,” ku iya.
Iya madah munyi nya ba aum media pengudah bejadika Pengerami Ngintu Hari Orang Indu 2023 di Palan Konvensyen Penview (PCC) ditu kemari.
Ku Abang Johari nambah, iya ke Singapura lalu bisi meda genturung pendiau Ang Mo Kio di Singapura enda dituntung penusah ampuh bah taja ba sungai.
Kebuah pia laban Singapura ngena konsultan ari Sweeden lalu iya minta Dato Sri Dr Sim Kui Hian, Menteri Pengerai Mensia Mayuh, Kaunsil Kandang Menua enggau Pengawa Berumah Sarawak nguna konsultan tu.
Dalam pekara bukai, Abang Johari madahka iya deka madahka sebuah pekara bekaul enggau pemujur loji proto Sarawak ti ngemansutka 'bahan api' bio dalam timpuh dua bulan ti deka datai.
Pekara ti silik bekaul enggau tu ku iya deka ditemu dua bulan agi lalu ti udah tentu ku iya nya deka ngubah semua sukut ekosistem nengeri tu.
Ku iya nambah, iya udah betemu enggau Menteri Besai Datuk Seri Anwar Ibrahim bekaul enggau chara Sarawak dalam ngemansangka industri energi gadung.
“Iya (Menteri Besai) bisi berandau enggau aku lebuh ti ngagai Umrah naya bekaul enggau garis entara menua sereta industri ti tama ke Sarawak.
“Laban tunga kuing ekonomi kitai tu dipeda lain, kitai bisi ke mua ari sukut mitagasyen karbon lalu chara kitai nguing ngagai energi gadung.
“Nyangka iya deka nemu silik bekaul pekara tu,” ku iya seraya nambah pengawa betemu enggau Menteri Besai tu deka diatur.
Abang Johari madah iya udah dikangau meri jaku bekaul enggau energi di Bali, Indonesia pengudah Raya beserimbai enggau aum bekaul enggau energi.