KUCHING: Nadai apil deka digaga ngagai pemutus Kort Tinggi kemari ti udah mutuska enda nerima petisyen Dr Johnical Rayong Nyipa dikena nginsil pemutus kerusi Parlimen Lubok Antu lebuh Pengawa Bepilih Besai Ke-15 (PRU15).
Presiden Parti Sarawak Bersatu (PSB) Dato Sri Wong Soon Koh enggau Rayong (plaintif) madah, taja berasai sinu enggau pemutus tu, sida tetap bebasaka pemutus kort sereta nyadika tu pelajar dikena ngenegapka diri.
Sida madah munyi tu ngagai pengarang berita pengudah tembu prosiding kes kemari. Dalam prosiding tu Akim Kort Tinggi Datuk Duncan Sikodol udah mutuska Roy Angau Gingkoi udah dipilih enggau pematut nyadi Kaban Parlimen Lubok Antu maya PRU15.
Duncan mega ngemendarka peminta raban responden kena 15 Mac nyin tadi ngambika petisyen ti dibantaika Rayong tu dikinsil, ti enda ngena responden datai ke kort enggau pengawa pechara.
Pengari Gabungan Parti Sarawak (GPS) Roy Angau Gingkoi nyadi responden keterubah, lalu responden kedua enggau ketiga iya nya Pemesai Pengatur Pengawa Bepilih (RO) enggau Komiti Pengawa Bepilih (SPR).
Nitih ku Wong ke bisi datai ngagai kort kemari ti meri sukung ngagai Rayong madah, petisyen tu iya nya pelajar ngagai raban orang ti dilaban iya ngambika belajar iya nya enda tau bechiping dalam sebarang pengawa bepilih.
“Tu iya nya peljar dikena matih anak buah kitai ngambika seruran bejejaga dalam pengawa bepilih ti deka datai enggau ke bukai,” ku iya.