Pengemeran industri hortikultur patut bebendar ngiga chara ngemansangka industri tu, ulih ngangkatka ekonomi
"Tu sebengkah ari aktiviti ekonomi ti deka meri penguntung ngagai ekonomi enggau pengemeran dalam hortikultur.
Datuk Patinggi Tan Sri Abang Johari
Premier Sarawak
Dikarang Rengenyan Labang
KUCHING: Hortikultur sebengkah industri ti bisi potensial ukai semina ngagai industri dagang temuai tang mega meri empas ngagai ekonomi menua.
Premier Sarawak, Datuk Patinggi Tan Sri Abang Johari madah, nya alai pengemeran industri hortikultur patut bebendar ngiga chara kena ngemansangka industri tu.
Berindik ari pekara nya, iya amat ngarapka Borneo International Garden Expo Sarawak 2023 (BIGEXS 2023) ti keterubah iya diatur deka ulih ngiga chara ngemansangka industri hortikultur ba negeri tu.
"Aku ngarapka pengawa pemandang tu ti lalu ditangkan seminar (BIGEXS 2023) ulih 'brainstrom' nama pekara ke patut dikereja kitai kena ngemanahka menua kitai tu, sereta dalam timpuh ti sama ngemansangka hortikultur nyadi sebagi komoditi ke ulih dieksport.
"Tu sebengkah ari aktiviti ekonomi ti deka meri penguntung ngagai ekonomi enggau pengemeran dalam hortikultur.
"Dikearapka pengawa pemandang tu deka meri ownemu baru ngagai kitai bekaul enggau hortikultur sereta udah nya ngemansangka iya (industri hortikultur," ku iya.
Abang Johari ngenang pekara tu lebuh ti bejadi BIGEXS 2023, ti diatur Borneo Convention Centre Kuching begulai enggau Kompeni Orchidwood ba BCCK ditu, kemari.
Bejaku baru iya madahka menua di dunya tu nyadika bungai nyadi pematak dalam industri dagang temuai baka Taiwan, Thailand enggau China.
Lebuh dikerandau raban pengarang berita, iya madahka pengawa ngemanah mengeri besai ngena bungai serwta aum besai ke bukai baka BIGEXS deka difokus ba Kuching.
Kebuah pia ku iya, laban memgeri besai bukai baka Miri ngembuan pematak ke diri empu baka Gua Mulu, sereta pia mega Sibu biai pematak kediri empu.
Kelimpah ari nya, dalam jaku pengelalu, Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madah ngelakuka industri utai tumbuh ke jarang ditemu enggau potensial dagang temuai, Sarawak ulih ngemayuhka industri dagang temuai sereta nyungkakka penumbuh ekonomi ba rantau tu nengah pengawa ngatur BIGEXS 2023.
Nitih ku iya, BIGEXS 2023 dipelaba deka meri empas ngagai ekonomi sechara lansung enggau enda lansung ti urung RM4.4 juta dalam timpuh tiga hari tu, sereta dipelaba nerima urung 20,000 iku orang.
"Kelimpah ari meri penguntung ngagai ekonomi enggau jampat, BIGEXS 2023 dipelaba nyendiaka siti agi produk dagang temuai ti nyelai ungkup Sarawak dalam timpuhima taun ke deka datai.
"Kitai meda ekspo tu bisi potensial nyadi pengerami pematak temuai ke baru, sebaka enggau pengerami besai bukai baka RWMF.
"Nyadi tuai pengatur ekspo tu, Sarawak bulih penguntung ari sukut ekonomi empas ari temuai ke datai baru," ku iya.
BIGEXS 2023 keterubah iya dipejalaika ba Sarawak, berengkah ari 17 ngagai 19 Mac 2023 dipasuk penyereta Malaysia, Singapura, Thailand, Taiwan enggau China.
Nyerumba BIGEXS 2023 dua bungai orkid digaga khas ungkup Abang Johari enggau bini Puan Sri Datuk Amar Juma'ani Tuanku Bujang, ke diberi nama Vanda Premier Abang Zohari enggau Vanda Juma'ani.
Sama bisi datai ba pengerami tu, Sapit Premier Sarawak Dato Sri Sim Kui Hian, Sapit Menteri Industri Kreatif enggau Seni Pemerindang Datuk Snowdan Lawan enggau sida ke bukai.