Dipilih nitihka penemu kaban komiti ti setuju ngena sistem begintir nyadi tuai pengatur tetiap dua taun entara MSN, negeri
“Rasional sistem begintir nyadi tuai pengatur endang kena ngurangka tating Perintah Besai meri bantu belanja ngagai negeri-negeri nyengkaum agih belanja dikena ngemanahka agi infrastruktur lumba enggau main, ungkus ngatur enggau melanja program nyendiaka atlit ba renggat negeri”
Hannah Yeoh
Menteri Nembiak,Lumba enggau Main
PUTRAJAYA: Sarawak kemari sechara rasmi dipilih nyadi tuai pengatur Sukan Malaysia (Sukma) 2024, lumba enggau main ti pemadu besai di menua tu ti ketiga kali pengudah edisyen taun 1990 enggau 2016.
Sarawak dipilih maya Aum Komiti Tetinggi SUKMA ti bechairmanka Menteri Nembiak,Lumba enggau Main, Hannah Yeoh.
Ku Hannah,Sarawak dipilih bepelasarka penemu kaban komiti ti sama setuju ngena sistem begintir nyadi tuai pengatur ti begintir tetiap dua taun entara Kaunsil Lumba enggau Main Menua (MSN) enggau negeri.
Ku iya, Sukma 2026 deka diatur MSN lalu Kelantan setuju nerima tanggungpengawa nyadi tuai pengatur edisyen taun 2028 ambika sida bisi timpuh ti lama agi kena nyikap diri.
“Rasional sistem begintir nyadi tuai pengatur endang kena ngurangka tating Perintah Besai meri bantu belanja ngagai negeri-negeri nyengkaum agih belanja dikena ngemanahka agi infrastruktur lumba enggau main, ungkus ngatur enggau melanja program nyendiaka atlit ba renggat negeri,” ku iya.
Hannah madah munyi nya maya media pengudah nyadi chairman Aum Komiti Tetinggi Sukma ba Menara Opis Menteri Nembiak enggau Main (KBS), Putrajaya ditu, kemari.
Ku iya, komiti tetinggi nya mega ngemendarka langgur ambika 28 bansa lumba enggau main mesti dipekitka berengkah ari edisyen 2024.
Entara rintai 28 bansa main ti mesti dipekitka iya nya akuatik (nyemerai enggau terejun), angkat berat, badminton, bebasikal (trek enggau jalai besai), gimnastik (artistik enggau gimrama), golf, belaban pedang, nimbakka panah, nimbak, belanda, belayar enggau hoki.
Ngenapka rintai nya judo, ping pong, taekwondo, karate, boling padang, pencha silat, sepak takraw, skuasy, tenpin bowling, wushu, main bol, ragbi, bola jaring, bola keranjang, bola tampar enggau tenis.
Berebak enggau nya Hannah madah, nyadi tuai pengatur edisyen taun 2024, Sarawak diberi pilih milih sekeda lumba enggau main tambah, lalu sida udah ngaga pemutus ngerintaika empat bansa lmain iya nya tinju, muay thai, petanque enggau main elektronik, tang bepanggai ba penyampau minimum penyereta ari enam negeri baka ti bisi dalam 'Peraturan Am Sukan Malaysia'.
Iya mega madah, momiti mega setuju enggau MSN ngatur sesi sama nagtur begulai enggau serakup lumba enggau main menua enggau pemegai chengkeram ke bekaul dikena mansik engka deka muka penyereta nya ngagai mayuh agi lumba enggau main ambika dipekitka ba edisyen Sukma jemah ila. -- BERNAMA