Perintah Sarawak nengah KPWK mega deka ngenukuka kebuah sida tu enda ulih ngaga dokumen pengelala diri
"Perintah Sarawak nengah Opis Menteri (KPWK) Dato Sri Fatimah Abdullah, kitai diatu bejalaika pengawa mansik dikena meda tauka nemu berapa mayuh bala anak kitai ke nadai peranak menua tu.
Datuk Patinggi Tan Sri Abang Johari Tun Openg
Premier Sarawak
Dikarang Rengenyan Labang
KUCHING: Perintah Sarawak nengah Opis Menteri Pemansang Indu, Nembiak Mit enggau Pengelantang Komuniti (KPWK) benung bejalaika pansik kena nemu pemayuh bala nembiak ba negeri tu ke nadai status peranak menua.
Premier Sarawak, Datuk Patinggi Tan Sri Abang Johari Tun Openg madah ba pansik nya mega deka ngenukuka kebuah enda ulih ngaga dokumen pengelala diri.
Iya madah tu dikena nentuka bala nembiak tauka anak ulih ngasaika hak sereta penguntung pelajar enggau servis pengerai ke bisi disediaka perintah.
"Perintah Sarawak nengah Opis Menteri (KPWK) Dato Sri Fatimah Abdullah, kitai diatu bejalaika pengawa mansik dikena meda tauka nemu berapa mayuh bala anak kitai ke nadai peranak menua tu.
"Kedua, (pansik ke dipejalaika tu dikena meda) pekara tauka kebuah sida enda bulih dokumen ketegal penanggul ti disebut menteri tadi baka enda berurun, tikah enda direjister, pengada anak enda direjister (sereta ke bukai) ti patut iya diputarka ruang bilik nya empu.
"Kami (perintah) enda ulih ngerejister ke kita, apai indai ti ngerejister ke anak tu lalu sida Opis Residen enggau Opis Pelilih Menua ulih mantu awak ke dokumen tu ulih dikena baka ti dipinta tauka ditetap dalam Perlembagaan Malaysia," ku iya.
Abang Johari nyebut pekara nya lebuh iya bejadi pengawa nyuaka Dokumen Sementara Individu Tanpa Kewarganegaraan Di Sarawak (DSITKS) ti diatur KPWK ba Wisma Bapa Malaysia ditu, kemari.
Bekaul enggau pekara nya, iya madah nya chara tauka jalai perintah negeri mantu bala anak tauka nembiak ke nadai peranak menua, laban kuasa ngeluarka dokumen nyadi peranak menua iya nya perintah besai.
Kena nyaup perintah, iya minta bala ketuai komuniti ibuh ke penanggul ti ditapi rayat ti dipegai, lalu ulih mantu Opis Pelilih Menua enggau Opis Residen kena nentu ke bala nembiak tauka anak ke nadai dokumen tauka tikah enda diregister bulih dokumen sementara.
"Ngagai bala ketuai komuniti aku minta kita ibuh ke nama pekara ke bisi nyadi ba genturung pendiau enggau rumah panjai, tu ukai ketegal kitai deka kiruh tauka ngachau pengidup orang tang ketegal sayau ke anak laban anak tu reta ruang bilik sereta anak meseti diberi pelajar ti betul awak ke sida nyadi anak ti meruan enggau mantu ruang bilik.
"Kitai ngarapka bala ketuai komuniti ulih mantu sida Opis Pelilih Menua enggau Opis Residen awak ke kitai bulih angka ke betul, ari tu perintah nengah opis menteri (KPWK) YB (Dato Sri) Fatimah ulih ngatur ngambika bulih dokumen, laban dokumen tu chukup beguna," ku iya.
Isu dokumen pengelala diri iya nya siti ari 14 pekara ti dikenatika perintah kitai ke lebih agi nengah KPWK, ku iya.
Ba pengerami tu kemari, Abang Johari diberi basa nyuaka dokumen sementara individu ngagai 45 iku penerima DSITKS.
Sama bisi datai ba pengerami tu, Sapit Premier Sarawak, Dato Sri Dr. Sim Kui Hian; Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah; Sapit Menteri Pemansang Indu, Nembiak Mit enggau Pengelatang Komuniti, Datuk Rosey Yunus enggau bala pemesai ke bukai.