KUCHING: Ejensi Pemansang Bagi Menu a Betong (BDDA) diatu udah sedia berengkah ngaga projek ti dirintaika ba renggat keterubah.
Chairman BDDA Datuk Amar Douglas Uggah Embas madah, semua ADUN nyengkaum iya empu ngarika Bukit Saban, udah netapka projek nitihka ti dikemeratka dulu.
“Kami udah netapka rintai projek renggat keterubah ti begunaka ungkus lebih RM740 juta.
“Sekeda projek ti diperambu sedia digaga pengudah nyikap diri enggau silik.
“Aku ngarapka semua projek tau berengkah digaga nyerumba bulan Ogos taun tu tauka tumu agi,” ku iya.
Iya bejaku munyi nya maya Pengerami Nutup Woksyop Ketiga Ngaga Projek BDDA ditu, ensanus.
Ku iya, BDDA diatu benung nganti pemutus Sekretari Pekara Wang Negeri (SFS) sentang maya projek nya tau berengkah digaga.
Uggah ke mega Sapit Premier Sarawak madah baru,rayat di bagi menua Betong amat nganti perambu BDDA kelebih agi ngena ungkup belanja ti besai iya nya RM1.5 bilion ti diterima dikena ngeranchakka pemansang.
Naka ke diatu ku iya, perambu nya nadai betelisih enggau projek ke selama tu ti udah dikemendarka ejensi enggau opis perintah ke bukai di bagi menua Betong.
Ku iya, komiti DDA tau merambu ungkup renggat kedua projek nyerumba bulan Mei taun tu.
“Pengudah renggat keterubah baka projek infrastruktur, nangkanka nya bekaul enggau sosioekonomi enggau dagang temuai.
“Bidang tu sama beguna amat laban kami deka nambahka penatai pemisi rayat sereta ngenegapka pengelantang pendiau, lalu udah nya nambah manah tikas pengidup sida,” ku iya.
Uggah ngarapka kerejasama ari semua kena ngemujurka juluk numbuhka BDDA.
Sama bisi datai maya nya, ex-Sapit Kepala Menteri Datuk Patinggi Tan Sri Alfred Jabu Numpang.