Nyadi hab ngatur, ngadu, nyukung enggau raban semua ubah gaya hari sereta insiatif dagang karbon di negeri tu
“Aku meri penemu ambika negeri tu ngembuan Sarawak Palan Ubah Gaya Hari ti deka meda enggau ngaduka semua pemansang dalam dagang karbon kitai, naruh karbon kitai enggau sektor bukai dalam ekonomi kitai awakka pengawa ti dikemerannya deka diatur enggau tuju ngenanka rampa asal negeri.”
Datuk Patinggi Tan Sri Abang Johari Tun Openg
Premier Sarawak
Dikarang Rengenyan Labang
KUCHING: Perintah negeri merambu numbuhka Palan Ubah Gaya Hari Sarawak ti nyadi hab ngatur, ngadu, nyukung enggau raban semua ubah gaya hari sereta insiatif dagang karbon di negeri tu.
Premier Sarawak, Datuk Patinggi Tan Sri Abang Johari Tun Openg madah berindik ari nya, endang patut amat numbuhka langkar kereja enggau tusun kereja Perintah Sarawak ti baru kena ngatur sereta ngaduka semua pekara ti bekaul enggau ubah gaya hari sereta dagang karbon.
Iya madah, palan tu ulih nyukung pemansang polisi enggau atur ti meransang pengawa ti tegap nyengkaum kuasa ulih dikemaru, ngaduka kampung enggau meruan sereta ke bukai.
“Aku meri penemu ambika negeri tu ngembuan Sarawak Palan Ubah Gaya Hari ti deka meda enggau ngaduka semua pemansang dalam dagang karbon kitai, naruh karbon kitai enggau sektor bukai dalam ekonomi kitai awakka pengawa ti dikemerannya deka diatur enggau tuju ngenanka rampa asal negeri.
“Palan tu deka ditumbuh pengudah langkar kereja enggau atur undang-undang ungkup ubah gaya hari enggau inisiatif dagang karbon tembu digaga.
“Diatu langkar kerejabenung digaga berengga sida luyar kami bekerejasama enggau oranisasyen antarabansa. Kami udah ngubah Kanun Tanah enggau Ordinan Kampung, tu awak ngagai kitai ngambi bagi dalam dagang enggau naruh karbon,” ku iya.
Abang Johari ti mega Menteri Kuasa enggau Pemeruan Rampa Menua nerangka pekara nya naya aum pengarang berita pengudah bejadi Aum Besai Karbon Asia ti diatur ba sebuah hotel ditu, kemari.
Bejaku baru iya madah, urung lima bengkah menua udah madah bisi ati deka nempa kerejasama enggau Sarawak bekaul dagang enggau naruh karbon.
Dulu ari nya, maya bejaku ba aum besai nya, Abang Johari madahka enggau pengawa numbuh Sarawak Palan Ubah Gaya Hari tau nempa Sarawak nyadi pengepun baubah gaya hari enggau inisiatif dagang karbon ba rantau tu, matak pemeranak pukul enggau penau kena nyungkak pemansang ekonomi ti meruan.
Dalam Sarawak bebendar ba pekara tu, ku iya, kitai beguna raban ti bepenau, orang bepeneleba sereta pengereja pengawa.
“Kami begunaka pemesai, orang ke bisi penau enggau jalai pemansut kena nentuka langgur ke ditetapka tu ulih nyadi nyata, mai Sarawak nyadi pengepunba ubah gaya hari enggau pemansang ekonomi ti meruan.
“Sarawak komited betapi enggau isu ubah gaya hari sereta deka terus nyerungkai lalu bejalaika strategi inovatif kena ngurangka empas ngagai rampa menua, ekonomi enggau rampa menua,” ku iya.
Bisi ngulu pengerami tu kemari, Sapit Premier Sarawak, Dato Sri Dr Sim Kui Hian enggau Datuk Amar Awang Tengah Ali Hasan, Sapit Menteri Kuasa enggau Pemeruan Rampa Menua Dr. Hazland Abang Hipni enggau sida ke bukai.