Dikarang Rengenyan Labang
KUCHING: Model Bioekonomi sebengkah ari chara inovatif ti deka dikena dalam Pelin Karbon di Sarawak, kena ngurang ngemansutka karbon enggau nempa dudi hari ti meruan agi.
Premier Sarawak, Datuk Patinggi Tan Sri Abang Johari Tun Openg madah, model tu chara inovatif dalam pemansang ekonomi enggau tuju ngena manah jalai pemansut biologi wilayah ngena chara ti meruan sereta betul.
Iya madah chara nya amat relevan ba kandang endur ti ngembuan populesyen asal ke udah ngemansangka penemu enggau penau sereta pemandai ngena jalai pemansut enggau meruan, sereta ulih dikena meransang pemansang ekonomi enggau rama.
“Sektor bioekonomi di Asia dianggarka ba rega makit, iya nya lebih ari 1.5 trilion USD dalam taun 2020 lalu dipelaba terus ngerembai ba taun ke deka datai.
“Sarawak ulih ngena enggau manah model bioekonomi ngena chara ngempungmekanisme tauka program 'offsets', ti bisi potensial nyendiaka jalai pemansut penatai pemisi negeri enggau rayat menua tu seraya mai ngagai mitigesyen ubah gaya hari.
“Siti chara kena nyambungka bioekonomi ngagai 'carbon offset' iya nya ngena chara ngaduka kampung enggau ti meransang ngena jalai pemansut ulih dikemaru ba pengawa ngasilka produk ngena bio seraya karbon dalam kampung,” ku iya.
Abang Johari ti mega Menteri Kuasa enggau Pemeruan Rampa Menua madahka pekara nya maya bejaku seraya bejadi Aum Besai Karbon Asia ke diatur ba sebuah hotel ditu, kemari.
Bejaku baru iya madah, Sarawak benung nyerungkai potensial ngemansangka projek biokuasa ti mai kuasa ulih dikemaru ari jajai pemansut biojisim baka laluh sawit enggau laluh.
Projek nya ku iya, engka ulih nyemelakakarbon ti ari baruh Verified Carbon Standard (VCS), ti nyendiaka kredit kena nyungkak jalai pemansut kuasa ngena minyak
“Siti ari pengelebih besai Model Bioekonomi tu iya ngemeratka pasal pengetanka dalam timpuh lama, nentuka jalai pemansut biologi diadu ngena chara nyaga ungkup rebak dudi ila.
“Siti agi pengelebih besai Model Bioekeonomi iya nya ulih mantu meransang inklusyenenggau ekonomi ti bela.
“Kena meri terima kasih ngagai penemu enggau chara idup peranak asal sereta nentuka pengawa ngagihka penguntung ti inklusif, model tu ulih mantu ngelakuka pemansang ti lebih meruan enggau betul tauka sebela,” ku iya.
Kelimpah ari nya, iya madah model tu nyendiaka chara ti lebih holistik tauka mungkur semua pekara dikena napi kebuah besai penyadi ngemansutka karbon enggau meransang pemansang ti meruan.
Bisi ngulu pengerami tu, Sapit Premier Sarawak, Dato Sri Dr Sim Kui Hian enggau Datuk Amar Awang Tengah Ali Hasan, Sapit Menteri Kuasa enggau Pemeruan Rampa Menua Dr. Hazland Abang Hipni enggau sida ke bukai.