Kelebih agi bansa Dayak laban tu ulih mulaika pemanah ekonomi menua, nyendiaka peluang gawa
"Industri (francais) bejalaika tanggungpengawa ti beguna senentang nempa tauka numbuhka peluang kereja.
Datuk Amar Douglas Uggah Embas
Sapit Premier Sarawak
Dikarang Rengenyan Labang
KOTA SAMARAHAN: Orang dagang nyengkaum bansa Dayak diperansang ngemeranka industri 'francais' ti dipeda ulih mulaika pemanah ekonomi menua ke lebih agi dalam nyendiaka peluang kereja.
Sapit Premier Sarawak, Datuk Amar Douglas Uggah Embas madah perintah menua lama udah nemu francais siti chara pemadu jampat kena nempa enggau nambahka penyampau orang dagang sereta ngelakuka industri tu ba Malaysia.
Mayuh orang ngemeranka industri tu ketegal ngembuan potensial ti besai, ku iya.
"Industri (francais) bejalaika tanggungpengawa ti beguna senentang nempa tauka numbuhka peluang kereja.
"Kitai temegah ati laban bisi entara indu Dayak to bejalaika pengawa dagang ngena chara tu, baka ti dipejalaika Sylvia Thomas (siku ari franchisee) ba bidang pelajar.
"Aku ngarapka mayuh agi indu Dayak ulih nitih chara tu, laban siti chara deka bejalaika dagang iya nya ngena chara francais," ku iya.
Menteri Infrastruktur enggau Pemansang Penyangkai Kapal nerangka pekara tu lebuh iya bejaku seraya bejadi palan Smart Reader Kids Taman Desa Ilmu ditu, kemari.
Bejaku baru iya mdahka Opis Menteri Dagang Dalam Menua enggau Kos Pengidup begulai emggau Gerempung Francais Malaysia (MFA) enggau Perbadanan Nasional Berhad (PEMAS) udah ngatur mayuh inisiatif enggau program pemansang francais.
Ku iya, nya nyengkaum Dana Bantuan Pembangunan Francais, Skim Pembiayaan Francais Kecil dan Pembangunan Francais enggau Pembangunan Produk Francais Tempatan, ku iya.
Opis menteri nya mega udah netapka tagit ngagai industri tu ngerembai entara 20 ngagai 30 peratus taun tu, ku iya.
"Ba negeri kita, Premier Sarawak, Datuk Patinggi Tan Sri Abang Johari Tun Openg mega sama meransang ngambika lebih mayuh orang dagang menua tu bejalaika industri ti chakah ngerembai tu.
"Sarawak naka ke diatu semina bisi 11 kompeni francais ti nyengkaum ba kategori baka pemakai enggau ai irup, pengerai, pengelantang pendiau enggau servis," ku iya.
Bepelasarka ripot MFA, ku iya, nyentuk Disember taun 2022, bisi 1,154 jenama francais udah berejister enggau Opis Menteri Dagang Dalam Menua enggau Ungkus Pengidup, kelimpah ari jenama ari Malaysia mega udah datai ba 82 buah menua.
Kelimpah ari nya, lebuh ti ngenang pekara pelajar, Uggah madah bala anak tauka nembiak jeman diatu nyadi pemesai dudi hari.
Nya alai, ku iya, nyadi tanggungpengawa kitai nyendiaka sida penemu enggau kereban awakka ulih nyadi peranak ti manah, bisi pengarap ba diri enggau produktif ba menua kitai.
"Kena nyapai tuju nya, pelajar tumu nembiak mit amat beguna laban peneleba keterubah sida maya belajar ulih mantu pengerembai sida.
"Ambika chunto, bala nembiak ba Smart Reader Kids tu sida bisi jati diri ti tinggi enggau ulih bejaku sereta nulis enggau landik dalam Jaku English. Sida bisi oengelebih ba bejaku, macha enggau nulis," ku iya.
Dulu ari nya, Ketuai Pemesai Eksekutif Smart Reader Worldwide Sdn Bhd, Dato Sri Dr Richard Ong madah, bejadi palan ba Desa Ilmu tu ngarika 22 palan Smart Reader Kids di Sarawak, serwta palan keterubah dibuka kenyau 20 taun ke udah.
Iya beterima kasih ngagai perintah, opis menteri enggau komuniti Sarawak ti seruran nyukung Smart Reader Kids.
"Enggau penetap 2030 perintah Sarawak deka nyungkakka penumbuh enggau pemansang sosioekonomi dalam timpuh 10 taun ke deka datai, ti chukup ngemeratkaekonomi digital, kami ngarapka ulih terus ngerembaika palan kami ditu sereta nyendiaka oelajar tumu nembiak mit ti bekualiti enggau ulih nangkup peminta guna kereja jemah ila," ku iya.
Sama biai ba pengerami tu kemari, Franchisee Smart Reader Kids Taman Desa Ilmu, Kota Samarahan, Sylvia Thomas sereta sida ke bukai enggau apai indai.