Dikarang Rengenyan Labang
KUCHING: Opis Menteri Pelajar Malaysia (KPM) dikearap meri awak tauka peluang lebih besai ngagai pengajar peranak Sarawak enggau Sabah ngisi penuduk pengajar ke puang ba dua buah negeri nya.
Ahmad Faisal Osman tauka lebih dikelala enggau nama Pengajar Emmet madah Sarawak entara negeri ti pemadu balat tauka kritikal begunaka pengajar berindik ari pemayuh pengajar peranak Semenanjung Malaysia di Sarawak pulai ngajar ke menua diri empu ba taun 2020 enggau 2021.
Ku iya, kena napi peminta guna nya KPM ngaga pemutus ngambi pengajar baru enggau Skim Servis Kontrak (COS) tang sekeda ari sida nya enggai nerima lebuh dianjung ngajar ke Sarawak.
“Kebendar nama pekara ke pemadu beguna pengeransing nyadi pengajar.
“Enti nuan pengajar ke ngembuan pengeransing ngajar ti lurus, nuan deka nerima enda ngira dini endur dianjung ngajar.
“Ukai semina manis ba mulut aja maya interviu ensembur ai liur madah ‘aku sanggup enti dianjung ngajar enda ngira endur’. Tang lebuh diasuh ngajar ke Sarawak enggau Sabah terus enggai nerima.
“Aku ngarapka KPM lebih ngemeratka peranak negeri Sabah enggau Sarawak ngisi penuduk puang ditu. Tuku ke sida amat bisi runding pengajar kena bejalaika tanggungpengawa nyadi pengajar ditu,” ku Pengajar Emmet ba penerang dalam media rama Facebook iya apin lama.
Iya madah bala nembiak baka ba sekula Rancangan Penempatan Semula (RPS) orang Asli; Long Pasia, Sabah; Nanga Mujong Kapit, Sarawak; Pulau Aur, Johor sereta sekeda sekula ba kandang endur ke bukai beguna pengajar ke amat bisi semangat nyadi pengajar.
“Enti kita milih endur bejalaika servis... Reti nya kita ukai lurus ati deka nyadi pegajar,” ku iya lebuh ngenang pekara ke nyadi buah mulut beberapa hari ke udah iya nya pasal 200 iku pengajar ti diasuh ngajar ke negeri Sarawak ti enggai nerima gawa ditu.
Pengajar Emmet ti asal ari menua Perak sereta ngajar ba Sekula Primari (SK) Pulau Seduku Lingga, Sri Aman madah, semina pengajar nya empu nemu kebuah diri enggai nerima maya dianjung ngajar kitu, tang trend ngayanka pengajar dianjung ngajar ke Sarawak baka reti betapi enggau pengidup tusah ti udah tentu ulih ngeruga runding pengajar ke deka dianjung kitu.
“Jeman aku suba mayuh pengajar sanggup ngajar ke menua ulu laban deka ngiga peneleba enggau lain ari orang bukai. Jeman ti idup enggau macham pengurang nya udah tentu meri runding tuai ba pengidup pengajar nya.
“Tang jeman diatu bebida, mayuh kebuah, entara iya pelaba aku bekaul enggau bungkur internet mega mayuh ngeruga pemutus sida,” ku iya.
Kelimpah ari apai indai nembiak gerah jari meri bantu, ku iya, kebendar ngajar ba menua ulu enda ngira P1, 2 enggau 3 Sabah, Sarawak, Pahang, Kelantan, Terengganu, Perak, Johor enggau negeri bukai mayuh penguntung laban bisi Elaun Bantuan Wilayah, Elaun Perumahan Wilayah, Elaun P1, P2 ,P3 sereta ke bukai, lalu semua nya ulih mantu idup ba menua ulu.
Penyampau nembiak ti beresjister sereta Sekula Kurang Nembiak (SKM) nya deka lebih meri pemuas ati ngagai pengajar baru nyerungkai chara ngajar ti lebih kreatif.
“Ditu (Sarawak) budaya bebasa ke bala pengajar agi tebal. Panjung pengaga bala anak Iban nyambut penatai pengajar ba pagar (sekula) chukup nyamai didinga.
“Tebal agi kandang menua di Song, Kanowit enggau Kapit udah bisi jalai besai. Sarawak semina sebuah negeri ke bisi pemadu mayuh padang bilun enti dibandingka jeman dulu suba urung taun 1900an deka pulai ke Semenanjung nganti dua taun sekali baru bulih tiket waran, diatu setaun sekali ulih pulai,” ku iya.
Bepelasarka ripot Bernama, Opis Menteri Pelajar kena 6 Mac 2023 madah nyentuk 30 September taun nyin tadi, ari 3,227 pemgajar “one-off” bisi 222 iku ke diasuh ke Sarawak enda ngeripot diri gawa tauka enda nerima
KPM nyaut dalam website Parlimen madah ngGambi sereta nyendiaka 3,227 pengajar "one-off" ti nyengkaum 2,621 pengajar dichirika tetap enggau 606 pengajar dichiri ngena chara COS dianjung ngajar ba Sarawak.