BAU: Unit Belajar Seumur Idup (PSH) Kolej Komuniti Mas Gading (KKMG) neruska inisiatif dalam ngenegapka orang dagang komuniti nengah Program Orang Dagang Komuniti (PKK) ungkup peranak ba pelilih menua Bau, Lundu enggau Padawan.
Nitih ku Direktor KKMG, Ts. Shirley Philip, bisi 15 iku pesereta udah dipilih nyereta program tu iya nya Kursus Gubahan Bunga ke alai program khas tu ari baruh PSH ti ngaul 67 buah kolej komuniti sereta 127 program dalam taun 2022. Pesereta tu iya nya ari raban orang indu ti ngintu ruang bilik sereta bala nembiak ke deka nyungkak penatai pemisi diri empu kelimpah mantu ngangkatka pengelandik diri.
“Kus pengelandik ngias bungai ti dipejalaika semilan hari tu udah dipejalaika ari raban pengelicha sereta orang dagang ti mujur enggau ngembuan peneleba sereta pengelebih diri empu enggau ngarapka ba ujung kus pesereta bisi bulih peminta ari luar sereta ngaga 'surprise delivery' nengah platform media rama diri, musin konvokasyen sereta hari ngintu jalai pengarap,” ku iya agi.
Shirley ba jaku lebuh ti bejadi nutup pengerami tu madahka deka seruran bekerejasama enggau gerempung, ejensi sereta gerempung ukai dikuasa perintah (NGO) di kandang menua nya nengah kus pandak ti disediaka kitai dalam mantu komuniti di kandang menua tu kelebih agi raban B40 sereta nembiak ngambika penemu enggau pengelandik ke dikemisi sida ulih meri pemaik dalam nyungkak penatai pemisi ruang bilik.
“Program tu mega iya nya pengawa dalam ngelakuka kolej enggau kerejasama entara raban KKMG begulai enggau ejensi perintah, gerempung orang dagang nyengkaum gerempung ukai dikuasa perintah sereta raban bekuasa kandang menua dalam nyendiaka kus ti relevan, mansang sereta ulih besemekih,” ku iya nambah.
Ba kenang ke bukai, sama ngarika pesereta bukai, Alicia Beldin madahka besai terima kasih ngagai raban KKMG senentang inisiatif nyendiaka enggau ngatur kus ti endang beguna ngagai raban orang indu ti ngintu ruang bilik ti chukup mantu nyungkak penatai pemisi ruang bilik.
“Aku berengkah ari nadai ngembuan pengelandik dalam ngias bungai lalu pengudah nyereta kus tu, aku udah nerima mayuh peminta ari luar nyau deka ninting hari sereta mega udah ngulu program bejual di premis maya Konvokasyen UNIMAS bedau lama ti udah, tu iya nya singkang ke mua ari aku dalam nambahka ekonomi ruang bilik,” ku iya ke nyadi pengari pesereta dalam program nya.
Sama bisi dalam pengerami tu iya nya Sapit Direktor Pengatur Munirah Yahya, Ketuai Unit PSH Lenny Lai, raban pengelicha kus sereta pengereja pengawa KKMG.
