Anda di sini

Transformasyen ba runding nuju  nyadi orang dagang digital

Advertisement

Peladangnita patut ngenatika chara nyual, mungkus enggau ngaga label produk dikena narit ati makit luar

Umang (dua ari kiba) nyuaka setipikit ngagai siku pengari penyereta woksyop,kemari.
Umang (dua ari kiba) nyuaka setipikit ngagai siku pengari penyereta woksyop,kemari.

"Batang tuju woksyop tu diatur laban kami deka bekunsi sereta mantu Peladangnita pasal mungkus,ngaga label enggau ngelakukka produk ngena platform digital kelimpah ari mai transformesyen ba runding”

Dikarang Rengenyan Labang 

KUCHING: Ngelakuka produk ngena kereban digital chara ti engkeman dikena orang dagang Sarawak kelebih agi raban Peladangnita tauka peladang indu ari Gerempung Peladang Kawasan (PPK) ngangkat sereta nyual produk ke luar negeri.

Kaban raban Direktor Gerempung Peladang Negeri Sarawak, Umang Nangku Jabu madah Peladangnita patut ngenatika chara nyual, mungkus enggau ngaga label produk dikena narit ati makit luar.

Umang ti mega Chairman Peladangnita madah, nya alai woksyop 'Transformasi Minda Ke Arah Pendigitalan Keusahawan' siti ati chara mantu raban Peladangnita mai transformasyen ba runding enggau nuju nyadi orang dagang digital awak ke ulih napi pemar ba pengawa dagang.

Taja pia, bala penyereta woksyop nya tebal agi udah nemu sereta ngemeranka dagang ngena chara digital baka ngelakuka produk ba Facebook, Instragram, media rama sereta nerima bayar nengah aplikasyen enggau online.

"Batang tuju woksyop tu diatur laban kami deka bekunsi sereta mantu Peladangnita pasal mungkus,ngaga label enggau ngelakukka produk ngena platform digital kelimpah ari mai transformesyen ba runding.

"Kami deka mandangka ngagai Premier Sarawak  platform digital chara ke pemadu engkeman dikena kami ngangkatka pemanah produk kitai Sarawak.

"(Penyampau orang dagang indu kami ke mujur ba renggat antarabansa) Bisi lebih ari 10 iku laban ke dipegai Peladangnita bekaul enggau kraf, pemakai enggau eko-dagang temuai.

Umang nerang pekara nya dalam aum pengarang pengudah iya nyuaka setipikit woksyop 'Transformasi Minda Ke Arah Pendigitalan Keusahawan Untuk Peladangnita Zon Selatan Dan Timur' ti diatur Peladangnita ba sebengkah hotel ditu, kemari.

Iya madahka bisi lebih 60,000 iku kaban Peladangnita ari 28 PPK serata Sarawak sereta ari penyampau nya urung 10 ngagai 20 peratus orang dagang tauka peladangnita ke chukup aktif ba dagang sida.

Nitihku iya, bisi lebih ari 10 iku orang dagang, produk sida udah datai ba renggat antarabansa baka produk Kina Karar, Coklat Borco enggau Leni's Spice.

"Penyampau produk Peladangnita datai ba renggat antarabansa disadang deka nambah, laban berengkah ari 24 ngagai 28 April ke deka datai kami ke Singapura ngelawa STATOS sereta ngelakuka produk kitai baka mee kolok, coklat Borco, Kira Karar, berau asal enggau produk bukai.

"Orang dagang ke dipilih Peladangnita tu sida ke ulih nyingkang jauh, bisi kualiti enggau chara mungkus produk sida. Enti diberi peluang produk dagang sida ulih dikerembai jauh kelimpah ari nyerungkai peluang nyual asil  di luar Sarawak tauka Malaysia," ku iya.

Woksyop tiga hari ti berengkah diatur 8 ngagai 10 Mac 2023 dipasuk 54 iku penyereta ari 12 PPK nyengkaum Kuching, Batang Lupar, Samarahan, Sri Gading, Bau, Saribas, Engkilili, Simunjan, Kalaka, Serian, Siburan enggau Pantu, sereta PPK Kapit.
 

Advertisement