KUCHING: Chara perintah ti ngemendarka duit galau ba Kumpulan Wang Simpanan Pekerja (KWSP) nyadi chengkeram nya siti langgur penemu ti enda manah.
Ketuai Pemesai Eksekutif (CEO) Faderasyen Pekereja Bank Sarawak (SBEU) Andrew Lo dalam penerang kemari madah, nitihka Akta KWSP duit ke digalau pemayar KWSP nya dijaga ari kena tengkerap.
"Nya alai, nama pekara ke ulih nyadi enti penginjau nya enda ulih mayar duit injau sida, sereta sekalika bank deka meri injau ngena chengkeram ke baka nya?" tanya iya.
"Laban skim tu ungkup sida ti amat tusah sereta deka nginjau duit, bisi risiko tauka penanggul besai enti sida ilap, lalu enggau kedua bank deka meri penyampau bungai ti lebih tinggi ari dividen KWSP.
"Ari nya, pemayar KWSP deka terus meda penyampau semua duit sida majak enda meruan.
"Nya mega deka nambahka tikas berutang ke udah manggai ba tikas ngirauka," ku iya.
Bekaul enggau pekara nya, Menteri Besai Datuk Seri Anwar Ibrahim maya aum Parlimen kena Hari Empat madah perintah deka meri kelala chara ti ngemendarka pemayar KWSP ngena duit nya ba ejensi nya nyadi ke chengkeram ngagai bank ti enggau tuju nyali sida duit.
Chara nya ku Anwar, tau diberi ngagai enda ngira bagi pemayar KWSP ti amat tusah sereta deka nginjau duit ngena chengkeram ari ejensi ti bekaul.
Anwar ti mega Menteri Pekara Wang madah, chara KWSP nya meri peluang ngagai pemayar ke bisi duit amat tusah ti deka nginjau ari bank, enggau jamin chengkeram bank, iya nya ti pemadu engekeman.