Nya mungkur sitak Parlimen Kota Belud enggau Kota Marudu di Sabah sereta Parlimen Sri Aman di Sarawak, ku Ahmad Zahid
“Estet padi tu deka kami buka enda ngelenyauka hak tanah perintah negeri enggau hak milik individu baka ti mujur dipejalaika di Pasir Salak ti dikelala enggau nama Estet Padi Seberang Perak”
Datuk Seri Dr Ahmad Zahid Hamidi
Sapit Menteri Besai
KUALA LUMPUR: Opis Menteri Pemansang Menua Pesisir enggau Wilayah (KKDW) nengah FELCRA Berhad deka ngemansangka estet padi ti besai di Sabah enggau Sarawak kena mutarka isu jamin pemakai menua.
Sapit Menteri Besai ke mega Menteri Pemansang Menua Pesisir enggau Wilayah Datuk Seri Dr Ahmad Zahid Hamidi madah, nya mungkur sitak Parlimen Kota Belud enggau Kota Marudu di Sabah sereta Parlimen Sri Aman di Sarawak enggau pemesai urung 15,000 nyentuk 20,0000 hektar.
“Estet padi tu deka kami buka enda ngelenyauka hak tanah perintah negeri enggau hak milik individu baka ti mujur dipejalaika di Pasir Salak ti dikelala enggau nama Estet Padi Seberang Perak.
“Aku udah minta sebengkah komiti teknikal ba renggat opis menteri enggau perintah negeri dipinta ngereja tu dua hari ke udah ambika meri sekeda 'input' ti beguna ba opis menteri kena mantu Sapit Menteri Besai (Datuk Seri Fadillah Yusof) ti nyadi chairman Komiti Kabinet Bekaul Jamin Pemakai,” ku iya.
Ahmad Zahid madah munyi nya lebuh nutup jurai Rang Undang-Undang Perbekalan 2023 di Dewan Rakyat kemari , mega meri terima kasih ngagai kedua-dua perintah negeri ketegal komitmen tinggi ti dipandangka ambika juluk nya ulih dikemujurka.
Kelimpah ari nya ku iya, ke tuju nambahka stuk pemakai menua, beberapa ejensi bekaul nyengkaum FELCRA enggau FELDA nambahka projek stuk pemakai menua baka nupi manuk, chapi ungkup dagin enggau Projek Urban Farming nanam chara fertigasi ti ngaul orang dagang mit enggau jelan pemesai ti diau enda jauh ari pasar.
Ahmad Zahid mega madahka opis menteri nya nagit abis nadai 300 iku nembiak ba raban Orang Asli mujur masuk Institut Pelajar Tinggi Perintah (IPTA) taun tu.
Ku iya, taun siti nyin tadi bisi 330 mujur masuk universiti lalu nya pemujur ti manah ba raban bansa Orang Asli.
Kena nentuka pengelantang pendiau raban bansa, Ahmad Zahid madahka KKDW udah numbuhka Sekreteriat Pemansang Ekonomi Orang Asli ari baruh Opis Pemansang Orang Asli (JAKOA) lalu Kaban Parlimen Cameron Highlands Datuk Ramli Mohd Nor dichiri nyadi chairman.
Iya ngarapka enggau penambah agih belanja ngagai JAKOA penyampau RM156.6 juta taun tu, pemansang rebak baru raban bansa Orang Asli sama ulih ditambah.
Ngenang pasal getah lela tauka lateks, iya madahka menua agi ngimport 80 peratus lateks nya ari menua luar enggau ungkus nyauka RM3 bilion.
“Ba pekara tu, kita ngambi sekeda atur kelebih agi nambahka depoh ngemansutka lateks ari 51 ti dikemisika diatu, kami nambah 15 iti agi depoh kena nambahka pemansut lateks sereta ngurangka import,” ku iya.
Ku Iya, Opis Bekuasa Pemansang Industri Mit Getah (Risda) mega sama meri fokus ngagai pengawa nanam enggau ngintu,maja, ngena kereban ngemayuhka lateks,nangkal enggau nyual asil.
Ba pengawa ngumpul asil lateks, Ahmad Zahid madahka agih belanja RM750,000 deka diberi lalu dijangka nguntungka 1,500 iku pekebun mit. -- BERNAMA