Peminta ti deka diputuska tu reti nya deka ditemu sekalika ulih tauka enda dikemendar nyadi peranak menua
"Kenyau ari komiti tu ditumbuhka (berengkah bulan Januari 2023) kami bisi nerima 946 peminta (nyadi peranak menua ari Sarawak) tang penyampau tu udah tentu deka berubah.
Datuk Seri Saifuddin Nasution Ismail
Menteri KDN
Dikarang Rengenyan Labang
KUCHING: Opis Menteri Dalam Menua (KDN) netapka pemutus 946 peminta ari Sarawak nyadi peranak menua ulih digaga sereta diputuska lebuh manggai bulan Jun 2023.
Menteri iya, Datuk Seri Saifuddin Nasution Ismail nerang ke reti pemutus sekali ke dikemendar tauka enda dikemendar nyadi peranak menua.
Iya madah kes tauka peminta ari Sarawak nyadi peranak menua iya nya inisiatif dipejalaika Perintah Sarawak nengah Opis Menteri Pemansang Indu, Nembiak Mit enggau Pengelantang Komuniti enggau kerejasama Opis Menteri Dalam Menua ti numbuhka baru Komiti Khas bekaul enggau Perkara 15A Konstitusyen Perintah Besai.
"Kenyau ari komiti tu ditumbuhka (berengkah bulan Januari 2023) kami bisi nerima 946 peminta (nyadi peranak menua ari Sarawak) tang penyampau tu udah tentu deka berubah.
"Maya numbuhka komiti tu pekara dikenati kami deka netapka 946 peminta meseti udah bisi pemutus lebuh manggai bulan Jun taun tu. Pemutus tu reti iya, keterubah dikemendar enggau kedua enda dikemendar.
"Sehari tu (kemari) bisi 146 peminta udah digaga pemutus sekalika dikemendar tauka enda, tang sebedau aum sehari tu (kemari) kami udah ngemendarka 177 peminta (ari penyampau 946 peminta)," ku iya.
Saifuddin nerangka pekara nya ba aum pengarang berita pengudah tembu Pengerami Nyuaka Surat Peranak Menua ke diatur ba sebengkah hotel ditu, kemari.
"Reti ditu, sida iya diatu udah nyadi peranak menua lalu bisi hak nyadi peranak menua, dijaga enggau bisi awak ngulihka pelajar tauka pemandai, nerima penguntung ari servis pengerai dibanding enggau sebedau tu maya status sida enda meruan," ku iya.
Dulu ari nya Saifuddin ti disempulang Menteri Pemansang Orang Indu, Nembiak Mit enggau Pengelantang Komuniti, Dato Sri Fatimah Abdullah nyuaka setipikit nyadi peranak menua ngagai 40 iku nembiak mit ke udah enggau sah nyadi peranak menua Malaysia.
Iya beterima kasih ngagai Fatimah ti bejalaika inisiatif nya ke udah ngemuntangka pengawa KDN sama enggau mantu mutarka pekara peminta nyadi peranak menua, ti mega setipak enggau polisi dipejalai Perintah Penyerakup.
Nitih ke penerang Saifuddin serata menua Malaysia ari taun 2015 ngagai 2023 bisi 152,000 peminta nyadi peranak menua.
Dalam timpuh bedau datai 110 hari nyadi menteri KDN, ku Saifuddin, iya udah meri pemutus ngagai 4,297 peminta lalu netapka lebuh manggai taun 2023 netap deka ngaga pemutus sepenyampau 10,000 peminta awak ke peminta nyadi peranak menua enda nganti lama.
"Penyampau semua peminta ti enda nyengkaum ke diproses Sarawak laban bisi komiti khas tu, iya nya ari taun 2015 ngagai 2023 bisi 152,000 peminta nyadi peranak menua ti bekaul enggau Pekara 15A, 152, 16, 19 tauka 30 Konstitusyen Perintah Besai.
"Tang bepelasarka rikot berengkah ari taun 2017 ngagai diatu, penyampau nya manggai urung 55,000 peminta. Lalu pekara ditetapka aku ba taun tu deka ngaga pemutus ngagai urung 10,000 peminta, tu ba renggat nasional," ku iya.
Iya madahka enda lama agi Raban Pengereja Pengawa Khas Opis Pengerejister Bansa deka ngelawa menua Long Singut mantu proses ngaga dokumentesyen sebedau nganjung peminta nyadi peranak menua.