BINTULU: Bansa Iban patut ngenanka adat enggau identiti sida ti nyelai, setipak enggau ubah jeman kena nentuka tradisyen ti dikemeranka komuniti nya agi diintu dipelihara, pia ku Sapit Menteri Pemansang Infrastruktur enggau Penyangkai Kapal, Datuk Majang Renggi.
Iya ke mega Kaban Kunsil Negeri Samalaju madah, Bansa Iban baka bansa Dayak ke bukai di Sarawak, endang kaya enggau adat sereta ngembuan main asal ti nyelai.
“Nya ngasuh Bansa Iban pegari nama laban ngembuan main asal ti manah sereta bisi rega komersial ti tinggi,” ku iya.
Iya bejaku munyi nya lebuh bejadi Seminar Adat Iban 1993 diatur Serakup Tuai Rumah Zon Suai Samalaju, ba Hotel Li Hua,kemari.
Ku iya, seminar nya diatur begulai enggau Kunsil Penyimpan enggau Penusun Adat Menua Sarawak (MAIS) patut nyadika malin ngagai tetiap iku tuai rumah ke ngulu seminar nya, laban nya nyadi lalau khas dikena sida nyaga adat nyengkaum ngiring peranak rumah panjai sida.
Kena ngemujurka nya ku iya, komuniti Iban di Bintulu kelebih agi ba sitak Samalaju patut tetap bepegai teguh ba adat enggau main asal sia kena nentuka sida terus dibasa nyadi bansa ti bepegai ba adat enggau ngembuan institusyen adat ke tegap.
“Ke tuju nya, rebak biak Bansa Iban patut belajarka tanda enggau muzik asal sida baka tabuh enggau ngajat, ambika nya terus ditampung sida nyentk ke jemah ila,” ku iya.
Ba timpuh ke sama ku iya, komuniti Iban mega patut ngenanka ngena ngepan asal sia lalu ngena nya engagu chara ke betul sereta enda jauh lari ari identiti asal Bansa Iban.
Ku iya, main asal bansa Iban patut dikomersialka ambika tau nyadi siti pematak ngagai temuai ari luar datai ke Bintulu kelebih agi ke Samalaju.
Seminar nya udah digulu urung 50 iku tuai rumah dalam sitak DUN Samalaju.