Berindik ari diatu nuju nyentuk taun 2030 mayuh projek kunstraksyen digaga di negeri tu kelimpah ari projek jalai
“Nya alai, aku meri langgur penemu (kunteriktor tauka kompeni ti patut) ngangkatka agi pengelandik staf tauka pengereja pengawa kita. Engka kita tau ngatur skim latih enggau sida universiti”
Datuk Patinggi Tan Sri Abang Johari Tun Openg
Premier Sarawak
Dikarang Rengayan Labang
KUCHING: Sektor kunstraksyen diperansang bejalaika inisiatif nempa kerejasama enggau institusyen pelajar tinggi di menua tu ba pengawa ngangkatka agi pengelandik pengereja pengawa.
Premier Sarawak,Datuk Patinggi Tan Sri Abang Johari Tun Openg madah, nya berindik ari diatu nuju ngagai taun 2030 mayuh projek kunstraksyen digaga di negeri tu kelimpah ari projek jalai.
Kena nangkup nya mega, perintah deka bejalaika mayuh inisiatif laban batang tuju (perintah deka meri pengelantang pendiau) ngagai rayat, ku iya.
“Nya alai, aku meri langgur penemu (kunteriktor tauka kompeni ti patut) ngangkatka agi pengelandik staf tauka pengereja pengawa kita. Engka kita tau ngatur skim latih enggau sida universiti.
“Awakka sida (universiti) nempa kerejasama enggau kita (kunteriktor tauka kompeni) nyadi staf kita, kita nyadi pengatur projek. Ari tu nembiak bulih peneleba, kita mega (ulih ngambi nembiak tu gawa) ti lalu ulih ngangkatka agi pengereja pengawa kita.
“Diatu (sektor) kunstraksyen ngena teknologi. Nembiak universiti sida chukup landik dalam teknologi baru ke ulih dikena dalam sektor Kunstraksyen,” ku iya seraya madah ulih mega nempa kerejasama enggau CIDB sereta CENTEX ba pekara tu.
Abang Johari bekunsi langgur penemu iya nyerumba bejadi Seminar Inisiatif Baru Kena Ngangkatka Industri Kunstraksyen Sarawak ke diatur Perintah Sarawak nengah Opis Kereja Raya Sarawak (JKJS) ba BCCK ditu, kemari.
Bejaku baru, iya madahka ngemeran sereta ngemeratka teknologi dalam sektor kunstraksyen ulih mantu nyaga ungkus projek sereta lebih efisyen.
“Nya kebuah aku meri penemu ngagai kunteriktor ngambika nempa kerejasama enggau universiti iya nya ngambi nembiak universiti nyadi pelatih sereta nyema sida manah nuan lalu ulih ngambi gawa enggau kompeni nuan.
“Ari nya mega (kompeni tauka kunteriktor) ulih nambahka produktiviti enggau ulih ngemeranka teknik tauka teknologi baru dalam kunstraksyen baru,” ku iya.
Sama bisi datai ba pengerami bejadi semina nya kemari, Sapit Premier Sarawak ti mega Menteri Infrastruktur enggau Pemansang Palan Penyangkai Kapal, Datuk Amar Douglas Uggah Embas; Sapit Menteri Infrastruktur enggau Pemansang Palan Penyangkai Kapal, Aidil Lariwoo enggau Dato Majang Renggi enggau pemesai ke bukai.