Laban sida kurang minat kereja perintah engka ketegal gaji nya mit
“Taja pan kami (Perintah Sarawak) udah ngakun Sijil Peperiksaan Bersepadu (UEC) tang agi mar mai kereja perintah laban gaji nya mit.”
Datuk Patinggi Tan Sri Abang Johari Tun Openg
Premier Sarawak
KUCHING: Perintah Sarawak diatu benung ngiga chara mutar sereta matak mayuh agi raban bansa China awakka gawa ba Opis Perintah Sarawak (SCS).
Premier Sarawak Datuk Patinggi Tan Sri Abang Johari Tun Openg madah, kebuah pia laban sida kurang minat kereja perintah engka ketegal gaji nya mit.
“Taja pan kami (Perintah Sarawak) udah ngakun Sijil Peperiksaan Bersepadu (UEC) tang agi mar mai kereja perintah laban gaji nya mit.
"Kita nanya Dr Sim (Sapit Premier Sarawak Dato Sri Dr Sim Kui Hian)… nyadi, tu antara penanggul ti ditapi kami tang kami agi nguji ngiga chara mutarka nya.
“Nya kebuah aku diatu benung ngaga pansik bakani deka nambahka SCS, enti (SCS) manah, engka orang Cina bisi minat kereja enggau kitai,” ku iya.
Iya bejaku munyi nya maya Pengerami Makai Lemai Taun Baru China (TBC) 2023 ke diatur Faderasyen Serakup China Bagi Menua Kuching, Samarahan enggau Serian ditu, malam ensanus.
Berebak enggau nya, Abang Johari meri jamin deka ngiga chara mutarka pekara nya seagi perintah Gabungan Parti Sarawak (GPS) agi megai Sarawak.
Ku iya, Perintah Sarawak benung ngaga skim gaji baru ungkup pengereja pengawa perintah Sarawak awakka ulih ngasaika gaji ti besai agi tauka lebih stabil setipak enggau gaya dengan ekonomi ke diatu.
Nengah chara tu ku iya, nya deka nentuka pengereja pengawa ti sikar enggau ngelaban ulah makai suap ba pengereja pengawa perintah.
Ku iya, bisi 10 menua (Denmark, Finland, New Zealand, Norway, Singapura, Sweden, Switzerland, Belanda, Jerman, Ireland enggau Luxembourg) di dunya ti ngembuan kes mimit makai suap dalam 'Indeks Persepsi Rasuah' (CPI) 2022 ti dikeluarka Transparency International (TI).
“Kita nemua nama kebuah ? laban pekereja din ngembuan gaji ti besai enggau tabung pinchin sida ke tejamin ungkup pengidup sida jemah ila.
“Enti gaji nuan (ke deka diberi) kachang, akita deka bulih kera tang enti kita meri gaji ti besai ngagai pekereja, kita deka bulih pakar ke bekualiti,” ku iya.