Anda di sini

Bantu orang nupi babi ti tekeruga ketegal ASF: Wee 

Advertisement

Pekara nya meri empas ekonomi ti besai ngagai semua industri lalu meri pengerugi besai ngagai orang ke nupi babi

Wee lebuh bejaku ba Pengawa Serumpu Lemai TBC, malam ensanus.- Gambar Roystein Emmor
Wee lebuh bejaku ba Pengawa Serumpu Lemai TBC, malam ensanus. - Gambar Roystein Emmor

"Kena mulaika pemanah sektor tu ti tekeruga ketegal igi penyakit nya, sida ke nupi babi tu amat begunaka bantu ari perintah kitai”

Dato Richard Wee 
Presiden Faderasyen Serakup China Bagi Menua Kuching, Samarahan enggau Serian 

KUCHING: Perintah Sarawak dipinta mantu orang ke nupi babi ti tekeruga ketegal jelu tupi nya ti dirampit Renga Babi Afrika (ASF), apin lama.

Presiden Faderasyen Serakup China Bagi Menua Kuching, Samarahan enggau Serian Dato Richard Wee madah, pekara nya udah meri empas ekonomi ti besai ngagai semua industri.

Ku iya, nya ukai semina udah ngujungka suntuk bekal ba makit tang mega rega komoditi balat niki lalu meri pengerugi besai ngagai orang ke nupi babi.

"Kena mulaika pemanah sektor tu ti tekeruga ketegal igi penyakit nya, sida ke nupi babi tu amat begunaka bantu ari perintah kitai.

"Nya alai, aku meri langgur penemu ambika perintah negeri ngatur penyereta konstruktif enggau orang ke nupi babi ti tekeruga kena mutarka pekara nya dalam timpuh panjai," ku iya.

Iya madahka pekara nya ba Pengawa Serumpu Makai Lemai Taun Baru China (TBC) 2023 ti digulu Premier Sarawak Datuk Patinggi Tan Sri Abang Johari Tun Openg ditu, malam ensanus.

Wee madah, entara nya orang ke nupi babi tau nyuwa tanah ari perintah ba kandang endur ti diungkapka.

Kelebih agi ku iya, opis menteri betanam betupi diatu udah ngembuan kandang endur ke diungkupka iya nya di Simunjan ti disikap ngena perengkaguna komprehensif bepusat sereta moden enggau rumah nyanyat ungkup orang ke nupi babi.

"Ba timpuh ti sama, kitai mega ngarapka perintah ulih meri bantu duit lengkas ngagai orang ke nupi babi kena ngangkatka baru industri tu," ku iya.

Pekara nya siti ari empat juluk ati ti dikearapka serakup ambika perintah Sarawak ulih mantu enggau mutarka penanggul ke ditapi.

Bekaul enggau isu tanah, Wee ngarapka langgur penemu numbuhka taman betanam betupi ti sebaka enggau konsep taman industri di serata Sarawak ulih dipejalaika enggau lengkas.

"Tu awakka orang betanam betupi enggau kompeni ti bisi ati ngambi, bagi kelimpah ari meransang sida awakka ngaul opis menteri ti bekaul kena meretika proses enggau penetap ti ditetapka.

"Laban skim ke baka nya deka meri status undang-undang enggau kena mutarka timpuh panjai pasal ngena tanah dalam sektor betanam betupi," ku iya.

Ngenang langgur penemu ke bukai bekaul enggau pengawa numbuh 'Dana Kekayaan Berdaulat', Wee ngarapka iya diaduka nengah chara ti terit enggau manah raban profesional ti bisi peneleba sereta ulih meri penguntung ti nadai betatak ngagai rayat Sarawak.

"Endang enggau pengarap ti tinggi ngarapka rayat Sarawak bulih penguntung ekonomi ari polisi perintah Sarawak," ku iya.

Advertisement