Perintah patut bejalaika atur ti lebih proaktif kena mutarka penanggul nya ketegal ngurangka agih belanja ungkup Kaban Parlimen
"Aku nemu berita ti dipansutka YAB Menteri bekaul enggau mutung agih belanja pemansang ungkup Kaban Parlimen ti dikurangka ari RM3.8 juta ngagai RM1.3 juta”
Dato Sri Alexander Nanta Linggi
Menteri Kereja Raya
KUCHING: Menteri Kereja Raya, Dato Sri Alexander Nanta Linggi madah, pengawa ngurangka penyampau agih belanja ngagai Kaban Parlimen deka ngeruga kualiti servis enggau bantu perintah ti ulih diberi pengari rayat.
Ku iya, ketegal nya perintah patut bejalaika atur ti lebih proaktif kena mutarka penanggul nya.
"Aku nemu berita ti dipansutka YAB Menteri bekaul enggau mutung agih belanja pemansang ungkup Kaban Parlimen ti dikurangka ari RM3.8 juta ngagai RM1.3 juta.
"Nyadi Kaban Parlimen enggau Raban Menteri Perintah Penyerakup, aku amat meretika atur tu mesti dipejalaika dikena ngelimat duit menua," ku iya madah nengah penerang berita kemari.
Nanta ke mega Kaban Parlimen Kapit madah, pemutus nya nengenyitka laban berundingka guna peranak menua enggau mayuh bengkah kandang menua kelebih agi di menua pesisir.
"Nyadi Kaban Parlimen Kapit, kandang endur di pala menua enggau gaya geografi ti mar sereta besai bungkur ti nyauka sebaka enggau pemesai negeri Pahang di Semenanjung Malaysia, tentu agih belanja tu enda chukup.
"Tu deka meri pemar ke besai agi ngagai aku ngaduka mayuh macham utai ke diguna peranak din sereta nambah manah infrastruktur ba sitak ti amat diguna rayat," ku iya.
Ku Nanta, tebala gi sitak Parlimen enggau Kunsil Negeri (DUN) di Sarawak jauh ba pala menua beguna amatka agih belanja tu.
Ku iya, agih belanja nya sebedau tu udah mayuh mantu Kaban Parlimen dikena nulung rayat sechara lebih efisyen nengah bantu ti ulih diberi terus sereta jampat ti enda nengah mayuh macham proses ba renggat opis pelilih menua enggau opis perintah.
"Agih belanja tu ke diberi ngagai Palan Servis mega nyadi ‘one-stop centre’ ambika di beri ngagai rayat ba sitak ti begunaka bantu enggau chara ke jampat.
"Ukai semina ungkup peranak menua pesisir, agih belanja ke baka nya meri penguntung ngagai peranak di mengeri engagu ke enda jauh ari mengeri.
"Ukai semina raban B40 enggau ke baruh, tang raban M40 mega bela kena empas ketegal gaya ekonomi ti enda manah sereta bepanggai ba bantu ari pengari rayat ngena agih belanja nya," pia ku Sekretari Besai Gabungan Parti Sarawak (GPS) nya.
Nanta ngaku bisi berasai tekenyit tang nerima pekara nya seraya ngarapka agih belanja nya ditambah perintah belama.
Tu kena nentuka rayat ulih dibantu enggau manah setipak enggau juluk Malaysia Madani, ku iya.
Kena Hari Lima (3 Febuari 2023) Menteri Besai Datuk Seri Anwar Ibrahim madah, agih belanja pemansang ungkup Kaban Parlimen deka dikurangka taun tu kena nyaga duit menua.
Ku iya, agih belanja nya deka diatur opis pelilih menua enggau pemesai pemansang negeri lalu diberi sechara berenggat enggau nitihka guna.
Ku iya, nya nyengkaum ungkup projek ti mesti digaga baka ngemanahka jalai alun enggau ngenalamka sungai.
"Agih belanja pemansang deka diberi sechara berenggat berindik ari penanggul ekonomi.
"Bisi peminta ambika nyerenih pekara tu baru, tang ungkup projekti mesti digaga, surau rusak, jalai tauka sekeda isu baka ngenalamka sungai enggau pekara ti berat, kami tau berundingka nya," ku iya.
Menteri Besai nya nyemetak madah, penyampau agih belanja nya deka diperundingka baru enti gaya ekonomi enggau duit menua belinsur manah dudi ila.