KANOWIT: Siti isu lama bekaul enggau ngaga Pangkalan Feri Sedaya ditu deka diputarka enda lama agi.
Pekara deka dikemeratka Kaban Kunsil Negeri Ngemah, Anyi Jana ti deka mutarka nya ambika bisi dikena peranak menua dia.
Ku iya, isu ngaga pangkalan feri nya suah disebut peranak menua dia.
"Aku udah berandau enggau ADUN Machan, Allan Siden Gramong kena mutarka isu Pangkalan Feri Sedaya ti suah disebut mensia mayuh.
"Nya nyengkaum ngaga jalai peniki ngagai feri ba Pangkalan Feri Sedaya ti deka dikemeratka dulu," ku iya lebuhka ngulu Pengerami Nasih Tanah Taba Rumah Baru Rumah Suring, Sungai Mapai ditu, bedau lama udah.
Ku iya, dua batang tiang ungkup jalai peniki ngagai feri muakka ari pasar Kanowit deka digaga ngena bajet Projek Transformasyen Menua Pesisir (RTP) ADUN Machan lalu dua batang tiang muakka ari Sedaya deka digaga ngena bajet RTP ADUN Ngemah.
Ku iya, ungkus semua ngaga empat batang tiang nya RM360,000 iya nya RM90,000 siti tiang.
Enggau pemisi feri nya, nya deka ngemudahka menua menua entara Nanga Tada, Mapai, Bejait, Sedaya enggau Bawan nurun ke pasar Kanowit sereta enda ibuh nengah pejalai ti jauh.
Pangkalan Feri Sedaya tu semina ba seberai pasar Kanowit.
Enti nadai pangkalan feri tu, peranak ditu enggai enda pan nengah pejalai ke jauh iya nya meraka nengah Jematan Durin enti deka ke pasar Kanowit.
Maya pengerami nya, Anyi ngun gkupka RM300,000 dibelanja ari baruh RTP DUN Ngemah Taun 2022 ungkup projek taba rumah baru Rumah Suring.
Ku iya, projek nya ari baruh kuasa Opis Kereja Raya (JKR) Bagi Menua Sibu.
Sama bisi ngulu pengerami nya, bini Anyi iya nya Gelim Utan, pengari Opis Pelilih Menua Kanowit (MDK) Kunsilor Cliff Unting enggau Ketuai Nembiak Parti Rakyat Sarawak (PRS) Bagi, Ngemah Stenny Willis.