KUCHING: Penegap negeri enggau penyerakup rayat iya udah mai Sarawak teulihka asil penatai pemisi pemadu tinggi dalam sejarah, RM11.9 bilion ba taun 2022.
Sapit Premier Sarawak, Dato Sri Dr. Sim Kui Hian madahka, Sarawak dalam timpuh kurang 10 taun tejapaika tiga penyulut besai (milestone) ti mayuh orang enda nemu tauka beratika penyulut nya.
Ku iya, tiga penyulut besai iya nya sebedau taun 2014 maya ba jeman Tun Pehin Sri Abdul Taib Mahmud, pengudah taun 2014 jeman Pehin Sri Adenan Satem sereta nangkan nya taun 2018 iya nya siti agi juluk besai di Sarawak.
“Nama penyulut besai (milestone) ba taun 2018? Bisi nyadi maya nya suba sida KL (Kuala Lumpur) enggai meri duit. Bepun ari nya kitai (Sarawak) berengkah ngiga duit kediri empu, tu pemun nya.
“Perintah kitai Gabungan Parti Sarawak (GPS) berengkah enggau pengawa duit awakka kitai bulih lebih mayuh agi duit, ti lalu ulih meri lebih mayuh agi duit ngagai rayat di Sarawak. Enti nadai duit bakani deka meri duit?
“Ari baruh Perkara 112D, perintah besai patut nya meri kitai duit ti asil ari chukai penatai pemisi kitai. Ba taun 2018 suba, opis menteri wang Malaysia madah deka meri RM40 juta sereta mayuh Kaban parlimen Sarawak nanya nama kebuah GPS enda ngambi duit nya.
Menteri Pengerai Mensia Mayuh, Pengawa Berumah enggau Kaunsil Kandang Menua nya dikerandau ba Rumah Tebuka Taun Baru China 2023 SUPP Batu Kawa ti diatur ba Dewan SJK (C) Chung Hua Batu Kawa ditu, kemari.
“Uji berunding nyema kitai nyain sempekat nya ba taun 2018 RM40 juta nya, lalu apin lama Menteri Besai Dato Sri Anwar Ibrahim meri kitai RM300 juta. Nasib amat kitai enda nyain nya suba enti enda pia kali kedua kitai kena kemula,” ku Kaban Kunsil Negeri (ADUN) Batu Kawa nya.
Iya ti ngenang pekara nya lebuh ti ditanya bekaul enggau asil penatai pemisi Sarawak ba taun 2022 sepenyampau RM11.9 bilion, sejarah pemadu tinggi kala dirikotka.
Bejaku baru iya madahka pengudah taun 2018 mayuh pekara ti digaga perintah GPS ti ngujung ulih ngiga belanja ke diri empu sereta bejalaika pemansang ngena duit perintah Sarawak.
“Kitai ngaga semua tu laban kitai bisi penegap, rayat Sarawak beserakup,” ku iya.