Anda di sini

MIPD komited nentuka projek ditembu nitihka timpuh, kualiti ti ditetapka

Advertisement

Agi mayuh ti patut digaga opis menteri enggau ejensi  taun tu nyengkaum ngereja baru projek 'sakit'

Uggah enggau bini iya Dato Doreen Mayang sereta Majang meda tanda singa lebuhka datai ngerami Taun Baru China 2023 MIPD, malam ensanus.
Uggah enggau bini iya Dato Doreen Mayang sereta Majang meda tanda singa lebuhka datai ngerami Taun Baru China 2023 MIPD, malam ensanus.

"Aku optimis enggau kerejasama rat, sukung enggau pemereti ati kami ke ulih dikemanahka agi. Kami ulih belajar ari penyilap ke udah, pemujur ti kami japai enggau mayuh teknologi baru ke tau dikena kami"

Datuk Amar Douglas Uggah Embas 
Sapit Premier  

KUCHING: Opis Menteri Infrastruktur enggau Pemansang Palan Penyangkai Kapal (MIPD) Sarawak komited nentuka projek pemansang ti ari baruh opis menteri nya ulih digaga tembu nitihka timpuh enggau kualiti ti ditetapka. 

Menteri opis nya, Datuk Amar Douglas Uggah Embas madahka opis menteri iya ngereja baru mayuh projek 'sakit' taja pan agi nyadi penanggul ti ngeruga.

"Kami agi bisi 340 projek ti tetangguh sechara kritikal. 

"Premier kitai mega,maya aum Komiti Pengatur Pemansang Negeri di Kapit apin lama dekaka Opis Kereja Raya (JKR) enggau JPS nentuka semua projek pemansang ke diberi ngagai opis menteri ditembu nitih ti udah ditimpuh sereta nitihka kualiti ti ditetapka.

"Aku optimis enggau kerejasama rat, sukung enggau pemereti ati kami ke ulih dikemanahka agi. Kami ulih belajar ari penyilap ke udah, pemujur ti kami japai enggau mayuh teknologi baru ke tau dikena kami," ku iya.

Uggah ti mega Sapit Prmier Sarawak ngenang pekara nya ba pengerami Ngintu Taun Baru China 2023 MIPD ba sebuah hotel ditu, kemari.

Berebak enggau tu iya mega meri terima kasih ngagai dua sapit menteri iya, Dato Majang Renggie enggau Aidel Lariwoo ke udah mayuh mantu enggau nyukung.

Kelimpah ari nya lebuh ti ngenang pasal penyulut  opis menteri taun nyin kemari, Uggah madahka ari RM7.724 juta Belanja Kena Ngatur, RM7.548 juta tauka 97.71 peratus mujur dibelanja.

Taja pia, Belanja Pemansang iya nya ari RM942.991 juta ti udah diungkupka, bisi RM642.751 juta tauka 68.16 peratus udah dikena, ku iya.

Sama bisi ngulu pengerami tu, bini Uggah, Dato Doreen Mayang;  Majang; Aidel enggau bini iya Dayang Ernie Awang Hashim, Kaban Parlimen Betong, Dr Richard Rapu, Sekretari Mendam MIPD Chiew Chee Yaw enggau Direktor JKR Negeri Ir. Richard Tajan enggau sida ke bukai.
 

Advertisement