Nya mungkur projek ari baruh Ejensi Pemansang Ulu Rajang (URDA), Projek Rayat enggau sekeda projek mit, ku Abang Johari
"Naka ke diatu,projek pemansang lanchar digaga, tang bisi projek ti laun digaga ketegal penanggul logistik”
Datuk Patinggi Tan Sri Abang Johari Tun Openg
Premier Sarawak
KAPIT: Agih belanja sepenyampau RM400 juta udah dibelanja Perintah Sarawak dalam timpuh tiga taun tu dikena ngaga projek pemansang di bagi menua Kapit.
Premier Sarawak, Datuk Patinggi Tan Sri Abang Johari Tun Openg madah, projek nya mungkur projek ari baruh Ejensi Pemansang Ulu Rajang (URDA), Projek Rayat enggau sekeda projek mit.
Ku iya, bagi menua Kapit udah ngerembai maju lalu baka nya mega kandang menua luar ari Kapit.
"Naka ke diatu,projek pemansang lanchar digaga, tang bisi projek ti laun digaga ketegal penanggul logistik.
"Kami deka ngiga alternatif bukai kena mutarka isu tu lalu nya begunaka timpuh," ku iya seraya madahka dalam Atur Pemansang Malaysia Lumpar Ke-12 (RMK-12) perintah deka ngaga pansik ba projek nya.
Premier Sarawak madah munyi nya maya aum media pengu dah nyadi chairman Aum Komiti Koordinasi Pemansang Negeri ba Kompleks Perintah Negeri ba Jalai Bletih,kemari.
Ngenang baru sentang penanggul logistik, Premier Sarawak madahka bisi kunteriktor napi penanggul ngangkut kereban kunstraksyen ngagai taba projek.
"Tu alternatif kena mutarka nya, kita tau ngangkut kereban kunstraksyen nengah sungai. Nya mega ulih ngurangka agi ungkus logistik, kelimpah ka nengah darat ngangkut barang nya," ku iya.
Maya aum media nya, Premier Sarawak mega madah, nengah pengawa ngaga projek ngemesaika pasar, pasar Kapit deka ngasaika ubah landskap pemansang.
"Kebendar iya kami udah bisi pelin besai dikena ngemesaika pasar Kapit. Projek tu deka mungkur ngemansangka palan komersial, pengawa berumah enggau jala alun ti deka kena nyambung pasar lama terus ke jalai besai ke Sibu," ku iya.
Premier Sarawak mega bisi nyuaka chek bantu duit turu sekula misyen di bagi menua Kapit ungkup taun 2022 ari Unit Pekara Jalai Pengarap Bukai (UNIFOR) sepenyampau RM944,800 enggau nyuaka setipikit nyiri baru ketuai raban bansa di Bagi Menua Kapit.
Nangkanka nya,Premier Sarawak lalu ngelawa Begunan Opis URDA.
Sama bisi maya nya,Menteri Kereja Raya ke mega Kaban Parlimen Kapit Dato Sri Alexander Nanta Linggi, Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Dato Sri Profesor Dr Sim Kui Hian.
Menteri Industri Pemakai, Komoditi Enggau Pemansang Wilayah Sarawak Dato Sri Dr Stephen Rundi Utom, Menteri Pemansang Orang Indu,Nembiak Mit enggau Pengelantang Komuniti Sarawak Dato Sri Fatimah Abdullah enggau bala bukai.