Taun tu taun kepenudi kompeni ngaga loji sida lalu bulan April taun tu, pengawa nguji ngisi gis ke dalam loji deka dipejalaika
"Enti mujur baka ke diperambu, Sarawak deka ngepunka operasyen ngeluarka metanol taun baru"
Datuk Patinggi Tan Sri Abang Johari Tun Openg
Premier Sarawak
BINTULU: Loji metanol Sarawak ,Petchem Sdn Bhd di Tanjung Kidurong dijangka ngeluarka metanol keterubah iya pada Januari taun baru, pia ku Premier Sarawak Datuk Patinggi Tan Sri Abang Johari Tun Openg.
Ku iya, taun tu taun kepenudi kompeni nya ngaga loji metanol keterubah sida iya lalu dalam bulan April taun tu, pengawa nguji ngisi gis ke dalam loji deka dipejalaika.
"Enti mujur baka ke diperambu, Sarawak deka ngepunka operasyen ngeluarka metanol taun baru," ku iya madah maya aum media spengudah nemuai seraya kereja ke Loji Metanol Sarawak Petchem di Tanjung Kidurong ditu, kemari.
Berebak enggau nya,iya minta kompeni nya ngaga penyangkai kediri ambi ngemudahka pengawa bekaul enggau kargo sereta kapal mai stuk metanol ngagai makit menua tu enggau antarabansa.
Ke tuju nya ku iya, mayuh pengereja pengaw ake udah diatih ari menua tu kelebih agi dalam bidang petrokimia udah diambi gawa Petchem ngereja pengawa ari pun nyentuk memproses kereban mata nya.
"Perintah Sarawak deka nentuka kandang menua Kidurong, Samalaju enggau ke besemak disikap ngena bungkur telekomunikasyen 5G ambi ngemudahka semua pengawa ti bekaul enggau industri sereta industri produk ke bukai ti ditumbuhka dia berindik ari pengerembai sektor industri di Bintulu kelebih agi di Kidurong," ku iya.
Ngenang pasal perambu nangkanka nya, Abang Johari madahka loji metanol kedua mega deka digaga pengudah loji keterubah nya mujur beoperasyen ila.
"Nengah peemujur nemu 10 iti endur gis asli ke baru di menua tu, lalu lapan ari nya di Sarawak, nya deka meri penguntung ngagai pengemeran industri ngemajuka agi industri petrokimiaenggau industri produk ke bukai," ujarnya.
Ku iya, pekara tu deka dipejalai nitihka guna pemeranak puku lalu deka dipejalaika sechara berenggat.