LIMBANG: Sapit Premier Sarawak Datuk Amar Awang Tengah Ali Hasan madah, perintah terus meri fokus ngemansangka sektor besai ti ulih ngerembaika pemansang ekonomi Sarawak.
Ku iya, tu mungkur dagang nengah dagang mit enggau jelan pemesai, pelajar, sektor dagang temuai, pengerai enggau betanam betupi moden.
“Nengah nyendiaka perengkaguna dalam sektor besai tu, kitai matak pemeranak puku sekalika ari luar tauka dalam,” ku iya lebuh dirandau media pengudah ngabang Taun Baru China (TBC) ngagai rumah ketuai bansa China di Limbang, bedau lama udah.
Sama bisi engagu maya program nya, Sapit Menteri Perengka Pengangkut Malaysia Datuk Hasbi Habibollah, Sapit Menteri Industri Pemakani, Komoditi enggau Pemansang Wilayah Sarawak, Datuk Dr Abdul Rahman Ismail, ADUN Batu Danau Paulus Palu Gumbang enggau Residen Limbang Yunus Tambi.
Ku Menteri Pengeraja Asal enggau Pemansang Mengeri Kedua ke mega Menteri Dagan Antarabansa nya baru, perintah mega meri fokus dalam bidang infrastruktur pelajar nyengkaum infrastruktur pengerai enggau perengkaguna ke bukai.
“Kami mega deka fokus ngemansangka sektor ekonomi, ari segi ekodagang temuai, betanam, betupi,berikan, agrokultur laban tu bisi potensial ke besai amat lalu industri mit engagu jelan pemesai nya bekaul enggau rayat,” ku iya.
Ku iya baru, perintah negeri mega merambu mngemansangka estet industri di Limbang ditu, numbuhka premis dagang ungkup sida ti ngaul diri enggau bidang memproses, nyual produk sereta numbuhka 'anjung usahawan' ditu.
Ngenang pasal projek pemansang ti diberi fokus taun tu, perengkaguna enggau infrastruktur ke bukai deka majak digaga perintah negeri kelebih agi di utara negeri.
Ku iya, antara projek ti diberi fokus nyengkaum bungkur jalai alun,neruska projek ngaga jalai besai pantai utara (NCH), Sarawak Link Road, sistem telekomunikasyen enggau ke bukai.
Rumah ke bisi alai iya ngabang maya program nya iya nya rumah Pemancha Leong Boong Ming, Penghulu Chua Beng Soon enggau Chairman Serakup Hokkien Limbang David Chua Kien Teen.