Ambika ari baruh dipegai perintah nSarawak sereta dikemansang nitihka perambu ti udah ditetapka
"Enti penyangkai kapal tu ari baruh pegai perintah Sarawak, nya deka meri penguntung ke besai agi ngagai pemansang ekonomi negeri tu kelebih agi ba sektor industri"
Datuk Patinggi Tan Sri Abang Johari Tun Openg
Premier Sarawak
BINTULU: Premier Sarawak Datuk Patinggi Tan Sri Abang Johari Tun Openg madahka pengingin ati Sarawak deka ngambi pulai baru Penyangkai Kapal Bintulu ari perintah besai ambika ari baruh pegai perintah Sarawak.
Ke tuju nya ku iya, perintah Sarawak deka berandau enggau perintah besai ambika nya dipulaika ngagai negeri tu lalu dipegai sereta dikemansang nitihka perambu ti udah ditetapka.
"Enti penyangkai kapal tu ari baruh pegai perintah Sarawak, nya deka meri penguntung ke besai agi ngagai pemansang ekonomi negeri tu kelebih agi ba sektor industri," ku iya.
Abang Johari bejaku munyi nya maya bejadi Pengerami Makan Lemai Genap10 taun Samalaju Industrial Port Sdn Bhd (SIPSB) ba Hotel Parkcity Everly ditu malam ensana.
Iya mega madahka diri temegah ati enggau penyulut SIPSB sekumbang ke beoperasyen ti udah manggai10 taun.
Ke rikod ku iya,dalam taun 2022, SIPSB udah ngerikodka penguntung sepenyampau RM164.6 juta nyengkaum pengulih ngeluaka kargo sepenyampau 6.6 juta tan.
Ku iya, pekara ti chukup manah tu mega berindik ari pemansang bidang industri berat ba Taman Industri Samalaju (TPS).
"Aku mega dipadahka ke alai penyangkai kapal tu deka mutarka lebih 10 juta tan kargo manggai ba taun 2030 lalu nya pemansang ti chukup manah," ku iya.
Ku Abang Johari, perintah Sarawak mega ngembuan juluk deka bekerejasama enggau Petronas ti bisi pekara dikemeratka dalam sektor industri bepelasarka gis enggau minyak kenyau ari suba.
Perintah Sarawak enggau Petronas ku iya, bisi rikod prestasi ti nyata mujur ngadu sereta megai Penyangkai Kapal Bintulu ngelama tu.
"Nengah komitmen ti sama sereta kerejasama manah entara Sarawak enggau Petronas, nya deka nentuka Penyangkai Kapal Bintulu bisi peluang ngaga transformasyen nyadi sebuah penyangkai kapal tauka hab pengangkut besai di rantau Asia Pasifik”, ku iya.
Sama bisi ngulu pengerami nya,Sapit Premier Sarawak Datuk Amar Douglas Uggah Embas, Menteri ba Opis Premier Sarawak Datuk John Sikie Tayai enggau Speaker Kunsil Negeri Sarawak Sri Datuk Amar Mohammad Asfia Awang Nassar.