SINGAPURA: Premier Sarawak Datuk Patinggi Tan Sri Abang Johari Tun Openg nyadi siku ari raban Menteri Besai Datuk Seri Anwar Ibrahim betemu enggau Menteri Besai Singapura ditu, kemari.
Abang Johari terebai ke Singapuralemai ensana ari Bintulu nyempulang Menteri Besai nemuai rasmi keterubah iya ke menua nya pengudahka dichiri nyadi Menteri Besai Malaysia Ke-10 bedau lama udah.
Pengudahka datai ditu, Menteri Besai lalu nyadi chairman aum pra pengawa nya begulai enggau pemesai Malaysia ba Suruhanjaya Tinggi Malaysia, berandauka pekara entara kededua menua ti deka dibantaika lebuh ti nemuai meri basa ngagai Menteri Besai Singapura, Lee Hsien Loong pagi kemari.
Abang Johari bisi enggau lebuh ke baum nya ti deka meri penerang ngagai Menteri Besai bekaul enggau kerejasama ekonomi entara Sarawak enggau Singapura kelebih agi bekaul eksport energi tau dikena baru enggau dagang karbon.
Abang Johari udah nya lalu enggau Menteri Besai nemuai meri basa ngagai Presiden Singapura, Halimah Yacob.
Lemai kemari, Menteri nyadi ketuai Malaysia ti disadang deka betemu enggau rayat Malaysia di menua nya maya pengerami ngirup lemai ti diatur Menteri Besai ba Suruhajaya Tinggi Malaysia.
Opis Menteri Luar nengah penerang berita ensana madahka Menteri nemuai ke menua nya laban ti dikangauka Menteri Besai Singapura, Lee.
Bala bukai ke sama bisi enggau nemua nya, Menteri Besar Johor Datuk Onn Hafiz Ghazi, Menteri Luar Datuk Dr Zambry Abd Kadir, Menteri Perengka Pengangkut Anthony Loke Siew Fook, Menteri Dagang Antarabangsa enggau Industri Tengku Datuk Seri Zafrul Tengku Abdul Aziz enggau Menteri Komunikasyen enggau Digital Ahmad Fahmi Mohamed Fadzil.
Premier Sarawak mulaika diri ke Sarawak lemai kemari lalu terus ke Bintulu, ke alai iya deka nyadi temuai ti dipebasaka ba Pengerami Makai Lemai Ngintu Genap 10 Taun Penyangkai Kapal Industri Samalaju.