JBPM diatu benung dalam proses minta baru agih belanja dalam RMK12 ungkup projek pemansang nya
"Nya alai, nambah enggau ngangkatmanah infrastruktur bomba baka projek ngaga balai bomba baru endang dikemeratka opis tu kena nentuka servis ke diberi manggai ba ikas optimum"
Mohammad Hamdan Wahid
Ketuai Direktor JBPM
SELANGAU: Opis Bomba enggau Penyah Penusah Malaysia (JBPM) diatu dalam proses minta baru agih belanja dalam Atur Pemansang Malaysia Lumpar Ke-12 (RMK12) ungkup projek pemansang infrastruktur bomba di negeri Sarawak.
Ketuai Direktor JPBM Mohammad Hamdan Wahid madah, projek nya nyengkaum Ngaga Akademi Bomba enggau Penyah Penusah Malaysia Wilayah Sarawak, Meli Begunan Balai Bomba enggau Penyah Penusah Batu Kawah, Ngemunka Kereja ba Taba Balai Bomba enggau Penyah Penusah Lubok Antu,Ngemunka Kereja Ba Taba Balai Bomba enggau Penyah Penusah Sungai Asap enggau Ngemunka Kereja ba Taba Opis Pangkalan Langit (MOB) Bomba di Kuching.
Mohammad ngarapka apeminta nya dikemendarka kena nentuka projek pemansang tu ulih diteruska kena ngangkatka tikas pengasi enggau penyikar servis bomba di negeri tu.
"Fokus JPBM ba taun 2023 iya nya neruska pengawa ngenegapka pengelikun ari penusah angus enggau bomba ti efektif sereta komprehensif kena nentuka tetiap iku rayat idup likun sereta lantang.
"Nya alai, nambah enggau ngangkatmanah infrastruktur bomba baka projek ngaga balai bomba baru endang dikemeratka opis tu kena nentuka servis ke diberi manggai ba ikas optimum," ku iya lebuh ke bejaku maya Pengerami Bejadi BBP Selangau ditu, kemari.
Ngenang pasal operasyen Balai Bomba enggau Penyah Penusah (BBP) Selangau, Mohammad madahka nya udah meri mayuh pemaik enggau empas positif ngagai nyauka 30,000 iku peranak di menua nya.
Ku iya, peranak Selangau tau enda bepanggai endar ba bantu raban penyelamat ari BBP Sibu enggau BBP Mukah ke sepenyauh urung 100 kilometer ari pelilih menua Selangau.
"Enggau pemisi balai baru tu, nya meri pengelantang ngagai rayat ditu sereta nyadi akses ngagai peranak dia minta bantu ari bomba nyema bisi nyadi kes penusah ngenyit,"ku iya.
Ku Mohammad, taja pan statistik panggilan ngenyit ba pelilih menua Selangau agi mimit, sechara pukul rata bisi 70 kangau setaun, tang penyampau nya dijangka nambah setipak enggau pengerembai pemansang di pelilih menua nya dalam industri sawit nyengkaum pengawa muka Jalai Besai Pan Borneo ba kandang Selangau sepemanjai 27 kilometer pdalam bulan November taun nyin tadi ti lalu ngeranchakka agi pejalai trafik ba jalai alun dalam kandang menua nya.
Kelimpah ari nya, penyampau kampung ti majak kurang ba pelilih menua tu enggau penyampau penyuah hari ujan ninting taun ti majak suah, dipeda deka nambahka risiko penyadi ampuh bah.
"Nya alai, enggau pemisi balai bomba baru tu, opis bomba deka semampai sedia meri servis bomba enggau nyelamat ke pemadu manah setipak enggau penambah risiko tu," ku iya.
Ku Mohammad baru, nengah operasyen BBP Selangau nya, ngujungka semua balai bomba di serata Sarawak bisi 38 buah.
Taja pia, iya ngaku penyampau balai ke diatu enda chukup kena nangkup guna servis bomba di Sarawak ti ngembuan pemesai 124,450 kilometer persegi iya nya nyauka sebaka enggau pemesai Semenanjung.
Nya alai ku iya, bungkur servis bomba kelebih agi di menua pesisir deka nyadi mar ketegal faktor penyauh.
"Dalam taun tahun 2022, pukul rata timpuh respons ti direkodka di negeri Sarawak iya nya 7.44 minit ke alai nya bisi nurun 7.8 peratus enti dibandingka enggau 8.07 minit pukul rata timpuh respons ti dirikodka ba taun 2021.
"Tu bisi mandangka pekara positif laban maya bomba berengkah bejalaika pengawa datai ba endur penusah nyadi majak jampat.
"Tim Bomba Sukarela (PBS) enggau Tim Bomba Komuniti (PBK) ti regas di serata negeri itu mega udah mayuh mantu maya penusah ngenyit nyadi lalu sida meri mega udah dulu agi mantu," ku iya.
Sama bisi datai maya nya, Kaban Kunsil Negeri Tamin Christopher Gira Sambang, Sapit Ketuai Direktor (Pemansang) JBPM Dato Edwin Galan Teruki,Direktor Bagi Pemansang JBPM Othman Abdullah, Direktor JBPM Negeri Sarawak Datu Khirudin Drahman, Sapit Direktor JBPM Negeri Sarawak Tiong Ling Hii enggau Komandan Akademi Bomba enggau Penyah Penusah Malaysia Sarawak (ABPMS) Wilayah Sarawak Azahar Dris.