SRI AMAN: Kaban Kunsil Nengeri (ADUN) Bukit Begunan Datuk Mong Dagang minta rayat di sitak dipegai iya terus meri sukung ngagai ketuai perintah nengeri dalam nentuka pemansang terus dipejalaika di kandang menua tu.
Nitih ku iya, sukung rayat ba renggat baruh ti betuaika ketuai bansa enggau ketuai komuniti di sebuah kandang menua nya endang beguna dalam nentuka pemansang ulih dipejalaika di kandang menua nya ulih nyadi nyata.
“Nyema nadai sukung rayat di kandang menua tu tetiap pelin enggau pemansang ti dilangkar perintah enda ulih dipejalaika nyema rayat nadai meri sukung penuh ngagai perintah,” ku iya.
Mong madah munyi tu lebuh ti bejaku ba Program Pengerami Begulai enggau Ketuai di Rumah Suting Punggu Dadak ba sitak DUN Bukit Begunan ditu.
Iya madah, perintah nengeri ti udah bisi diatu chukup siru enggau peminta sereta guna rayat kelebih agi di kandang menua pesisir.
“Pelin pemansang ari pengari rayat ulih dipejalaika pengudah bulih pemendar ari perintah,” ku iya.
Sama datai Pemesai UKAS DUN Bukit Begunan Jesi Bintoh, Penghulu Riji Gu, Penghulu Menjang Niah, Kunsilor Selimin Kering, Tuai Rumah Noria Ampat sereta bala bukai.
Ba pengerami tu Mong mega udah nyuaka geran perintah ngagai sekeda Komiti Pemansag enggau Pengelikun Genturung Pendiau (JKKK) nyengkaum JKKK Rumah Suting, Punggu Dadak.