Taun nyin kemari udah ngerikodka 303 iti kes enti dibandingka enggau 282 iti kes dalam taun 2021
LIMBANG: Sapit Menteri Perengka Pengangkut Datuk Hasbi Habibollah irau ati ke penambah kes penyalah narkotik ti diripotkan nyadi sepemanjai taun ke udah.
Bepelasarka statistik ari Kepala Polis Pelilih Menua Limbang ba gempuru ninting bulan apin lama ku iya, taun nyin kemari ngerikodka 303 iti kes enti dibandingka enggau 282 iti kes dalam taun 2021.
"Baka ti diripotka Kepala Polis Pelilih Menua dalam surat berita sebedau tu iya nya penyampau penyalah di Limbang nurun tang ari segi bansa penyalah, penyalah bekaul enggau dadah tu nambah di Limbang.
"Ba aku tu ti ngirauka laban maya kitai ngemaju enggau ngangkatka menua, tang bisi mega pengeran tauka ulah ti ngerusak bala anak kitai," ku iya lebuh dirandau raban media ba Anugerah Pelajar Cemerlang dan Dermasiswa Persatuan Melayu Limbang (PML) di Dewan Bunga Raya kemari.
Sama bisi ngulu progaram tu iya nya chairman PML Mohamad Abu bakar.
Kaban Parlimen Limbang nya madah, udah datai ba maya iya semua orang bekerejasama dalam pengeran deka ngelaban penyalah gian dadah nengah chara holistik enggau bebendar .
"Semua orang patut sama besaup ngelaban tauka ngemuntanka penyalah gian dadah ti nyadi munsuh lumur satu menua laban ulih ngerusak raban bansa kelebih agi raban biak.
"Penyalah gian dadah ulih nagang pengeran perintah ke deka ngemaju ke negeri enggau menua tu nyema rebak biak ti deka nyadi penampung pemesai menua rusak moral iya ketegal dadah," ku iya.
PML nyadi gerempung ti aktif ba pelilih menua Limbang ku iya, patut nempa kerejasama enggau gerempung ukai dikuasa perintah (NGO) sereta egensi penerit adat ke bukai kena ngelaban penyalah gian dadah ba pelilih menua nya.
"Aku meri langgur penemu ngagai PML awakka beratka pasal tu lalu beserakup tauka besaup enggau gerempung bukai baka NGO, begulai enggau ejensi perintah iya nya Agensi Anti Dadah Kebangsaan (AADK), polis enggau ke bukai ngatur mayuh bengkah program ke ulih matak nembiak kitai awakka enda tepejuh enggau ulah ke enda manah nya ke ulih ngerusak anak kitai," ku iya.
Ku iya, menisa mayuh enggau apai indai patut bekunsi tauka meri penerang bekaul ulah penyalah kelebih agi dadah ti nyadi ba kandang endur diri empu.
"Kitai patut nempa kerejasama lalu semua orang bisi tanggungpengawa, ambika chunto ngeripot enda ngira sekalika ba genturung pendiau, tumpuk pendiau, enda ngira sapa ti megai tanggungpengawa, ti disangka tu ngambika ngeripot ulah sida ti ngerusak anak kitai," ku iya.